Berisha në Facebook! Shpërthejnë sharjet

Me rastin e Ditës së Rinisë Berisha ka deklaruar se do jetë prezent në FB me një llogari të vetën. “Sapo iu bashkova FB, duket shumë praktik në I-PAD” ka thënë ai para të rinjve, prindërit  e të cilëve duhet të harxhojnë 2 rroga mujore që të mund t’ua blejnë I-PADin. Për fat të mirë të Kryeministrit, Fejsbuku është falas, dhe shqiptarët e kanë treguar pjesëmarrjen masive në gjëra falas.

“Unë do të dërgoj përditësime e fotografi dhe mezi pres të bisedoj me ju.” Ka thënë më tej Kryeministri, sigurisht pa qenë i informuar që FB është konsideruar si një nga armiqtë më të mëdhenj të efektivitetit në punë, saqë shumë kompani të mëdha e kanë bllokuar atë për punonjësit gjatë orarit të punës. Vetë Kryeministri, është njeri që punon tërë ditën, dhe vështirë të mendohet se ku do e gjejë kohën për të biseduar me popullin në FB. Gazeta Dita informon në numrin e saj të sotëm që faqja e Kryeministrit në FB është vërshuar nga sharjet, por që administratorët e faqes i fshijnë menjëherë komentet negative. “Situata në faqe është disi komike sepse tani aty gjenden replikat për sharjet, por jo vetë sharjet.” Se kush i paguan administratorët e faqes private të FB së Kryeministrit, dhe sa vetë janë që merren me këtë punë, do ishte mirë të dinim.

Dhe, një sondazh i hapur për të gjithë, Kryeminsitri do të preferojë më shumë Farmville (duke ditur pasionin e tij për arrorët e më gjerë) apo Mafia Wars?

k.c.