Berisha i izoluar nga diplomacia perëndimore? Gjepura; do takohet me zonjën Clinton

Sot Berisha është nisur për në SHBA, ku sipas njoftimit për shtypin nga kryeministria, “do të zhvillojë të mërkurën një takim me Sekretaren e Shtetit, Hillary Clinton, në përfundim të të cilit, [që të dy, zonja Clinton dhe ai] do të dalin në një konferencë të përbashkët për median”. Njoftimi për shtypin vijon më poshtë me një listë takimesh të tjera, të cilat afërmendsh nuk kanë rëndësinë e këtij takimi të së mërkurës.

Nuk ka diskutim që ky takim, dhe sidomos konferenca e përbashkët për shtypin, është një ngjarje që e rrëzon legjendën e izolimit të Berishës, në ngritjen e së cilës, bazuar në një logjikë gjërash e në një seri faktesh, ka kontribuar dhe respublica. Por Berisha edhe në këtë pikë na ka mundur. Takimi me Clinton-in i përgënjeshtron të gjitha këto teori. Ai nuk është hiç i izoluar. Përkundrazi.

Të kuptohemi, ne të respublica-s nuk heqim dorë nga ideja se Berisha e meriton izolimin ndërkombëtar, se Berisha do duhej izoluar me kohë e me vakt, dhe se zonja Clinton, me këtë takim, është duke e inkurajuar fort këtë njeri në paudhësitë e veta; gjithmonë, nëse takimi me Clinton-in është i vërtetë e nëse Clinton-i nuk i tërheq veshin fort gjatë e pas takimit.

Po pse e prêt ajo? Mendja ta thotë se këtë takim kryeministri e ka dhuratë prej lobeve amerikane, vëmendjen e të cilave e ka blerë me paratë e buxhetit të shtetit. I ka aktivizuar këto lobe këto javët e fundit, aq sa të vjen të besosh se duhet të jetë lodhur për ta futur këtë ‘dhuratë’ në xhep. Është e sigurtë se fjalën e fundit e ka marrë këto ditë. Duhet ta kenë marrë dje a pardje në telefon miqtë me bole të Bechtel-it, a miq të tjerë, dhe i kanë thënë: “U kry, bac! Do takohesh me teto Hillarinë”. Nuk ka si të jetë ndryshe. Nuk ka asnjë gjasë që të jetë vepër e ambasadës sonë në Washington; nga ana tjetër e dimë se ambasada ammerikane në Tiranë nuk ka gisht fare në këtë meselé (një burim shumë i besueshëm i yni nga brenda ‘asaj ndërtesës magjike’ në rrugën e Elbasanit na e ka thënë këtë gjë nga fundi i marsit; shih linkun: http://www.respublica.al/artikuj/2012/3/29/vizitat-ne-shba-festival-qokash-nje-burim-nga-amb-amerikane-ne-skemi-rol-eshte-nje).

Përfundimi? Përfundimi është që, po të jetë për amerikanët, Berisha mund të bëjë ç’të dojë në këtë vend e mund të rrijë në pushtet jetë e mot. Është e kotë të shpresojmë tek skrupujt dhe idealizmi i diplomacisë amerikane, apo i diplomacive të tjera. Ai nuk është problem për askënd. Ai është thjesht problemi ynë. Dhe o do ta zgjidhim vetë, o do ta kemi aty, rebus të përjetshëm.

M. Nano