Berisha e shtyn kohën në Facebook, poston ç’ti vijë për mbarë

Ndërsa ndjek në televizor garën për Kryetar të dy delfinëve të tij në PD, kryeministri në detyrë, Sali Berisha, përzgjedh edhe ndonjë mesazh “interesant” që i ka ardhur në Facebook dhe e poston në profilin e tij, sa për të thënë diçka të vogël, nga pak, çdo ditë. E kësaj here ka përzgjedhur mesazhin e një të riu me emrin Sebastian Dema, i cili i ka shkruar një javë më parë: “Unë jam shumë i ri dhe që nga viti 2005 nuk isha mësuar me humbjen e partisë me të cilën jam lidhur. Por, dua të të them të vërtetën, nuk e di se si, por që nga dita që u mor vesh humbja në mënyrë të çuditshme ndjej në veten time një forcë, një energji që unë kurrë nuk e kam ndjerë ndonjëherë për të bërë gjithçka që këta që erdhën në pushtet, t’i bëjmë prapë opozitë që në sekondat e para të mandatit tjetër”.

I frymëzuar nga Sebastiani, Berisha shkruan se: “Sot, për ne demokratët nuk mund të ketë koment tjetër veçse: Të gjithë jemi Sebastian! Përpara”. Duket se këtë verë, lajmet për thyerjen e rekordeve të qëndrimit në ujë e ka zëvendësuar me mesazhet e mbështetësve të tulatur nga humbja “e beftë” në 23 qershor.

R.K