Berisha bën Kasandrën: Qeveria e ngritur mbi mashtrimin e krimin, Rama do ta pësojë si Papandreu që e zhyti Greqinë në krizë. Ja pse nuk do të hap nesër punimet e Kuvendit

Kryeministri ende në detyrë, Sali Berisha, në orët e fundit të qeverisë së tij, konfirmon se nuk do të hapë punimet e Kuvendit. Duke bërë Kasandrën, kryeministri në ikje shkruan në faqen e tij në rrjetin social Facebook se mazhoranca e re është ngritur mbi mashtrimin, krimin si dhe paratë e drogës dhe ndaj parashikon se do ta pësojë si homologu i tij fqinj Papandreu që e zhyti shumë thellë Greqinë në krizë. "Të dashur miq, unë dua t'ju sqaroj pse refuzoj të hap nesër punimet e Kuvendit të ri. Kjo nuk ka asnjë lidhje me faktin se ne kaluam në opozitë. Por sepse kjo mazhorancë erdhi në pushtet me mashtrime antiglobaliste si ato të Papandreut në Greqi", - shkruan Berisha. Sipas tij, Papandreu mashtroi grekët duke iu deklaruar se "paratë janë por duhet të jemi ne" pra duhet ta votonin për të dalë nga kriza dhe po kështu Rama duke përdorur si dëshmitar të rremë Ilir Metën, iu premtoi shqiptarëve se shërbimi shëndetësor do të jetë falas pa kontribute, legalizimet do behën falas, çmimet do ulen për të gjitha ushqimet dhe energjinë, taksat do ulen për 95 % të shqiptarëve, do të krijojë 300.000 vende pune, etj. "Dy vjet pas mega mashtrimeve, Papandreu zhyti shumë thellë Greqinë në krizë, ndaj dhe qytetarët i prenë biletën dhe ai u zhduk. Së shpejti me siguri kjo do ndodhë edhe me Edi Ramën në Shqipëri", - vijon Berisha.

R.R.