Beppe Grillo "i mund" sondazhet

Në Itali nuk lejohet publikimi i sondazheve politike në dy-javshin para zgjedhjeve. Nga sondazhet e shumta që u publikuan në Itali deri dy javë ppara zgjedhjeve, partia e Beppe Grillos rezultonte me një përkrahje të 13-16% të elektoratit Italian. Ndërsa në sondazhet që u publikuan pas përfundimit të votimit (sot në orën 15), partia e Grillos rezultoi me 19% në sondazhin e institutit Tecnè (për Sky TV) dhe 20% në sondazhin e institutit Piepoli (për RAI TV). Por numërimi i votave po tregon se partia e Grillos ka arritur një rezultat më të lartë se sondazhet para zgjedhjeve dhe atyre pas votimit – deri në orën 21 të ditës sotme ajo ka marrë rreth 25% të votës popullore.
Sipas Dr.Piepolit, i cili bëri një koment të shkurtër në RAI Tv, pasaktësia e sondazheve, si atyre parazgjedhore dhe atyre paszgjedhore, e ka burimin tek nënkampionimi i moshave të reja. Në fakt, ky është një problem i të gjitha sondazheve kudo në botë, por nuk rezulton në pasaktësi kur ka një garë bipolare, sepse shpërndarja e votave të të rinjve është zakonisht e përpjeshme me moshat e mbikampionuara. Ndërsa kur në skenë futen parti të reja – si e Grillos – nënkampionimi i të rinjve deformon parashikimin, sepse të rinjtë e pakampionuar tentojnë të shkojnë drejt partive të reja që duan të shkundin statuskuonë. E.Zaloshnja