Basha në protestë: Vendit i duhet një “zot shtëpie”

Kryetari i PD-së, Lulzim Basha përpara kryeministrisë ka kërkuar dorëheqjen e Kryeministrit Edi Rama. Ai ka theksuar se vendi ka nevojë për një “zot shtëpie” dhe jo njerëz të marrë peng nga rrjeti i narkotrafikut. “Shqiptarët u ngritën dhe po ngrihen me thirrjen e opozitës, virtyteve dhe ëndrrave tona për të marrë në dorë fatin tonë. Për të mposhtur dhe shporrur oligarkinë mafioze të drogës.

Për të treguar me gisht Edi Ramën , si përgjegjësin kryesor për këtë gjëmë, duke i kërkuar të largohet, sepse vendi ka nevojë për zot shtëpie në krye të qeverisë dhe jo adjutant dhe pengje të narkotrafikut siç ka treguar Edi Rama se është. U bashkuan shqiptarët, ja ku janë ja ku jemi.”, ka thënë Basha. Ai ka deklaruar se sot shqiptarët janë bërë bashkë kundër drogës.

“Kjo është një ditë e madhe, ditë historike që unë me lejen tuaj kam nderin tua tregoj gjithë miqve dhe partnerëve tanë, fëmijëve që janë e ardhmja e vendit, brezave, kjo është Shqipëria e nderit, virtyteve më të mira. Kjo këtu është Shqipëria e ligjit, Shqipëria që nuk e ul kokën, nuk trembet, nuk gjunjëzohet, nuk gënjehet e nuk mashtrohet. Kjo është Shqipëria që lufton, që ndeshet, që sakrifikon për vlerat. Kjo është Shqipëria që nuk kthehet mbrapa.”, është shprehur Lulzim Basha. S.S