Basha është protektor i interesave të Berishës, thotë Selami Xhepa

Selami Xhepa, njëri nga ish deputetët e PD-së që u la jashtë listave të kandidatëve në 23 qershor, ka dhënë një intervistë për Shqiptarja.com, në të cilën thotë se gara brenda partisë u krye me nxitim dhe për pasojë, e deformuar. Ai mbështet reagimin e Astrit Patozit, duke këshilluar që e gjithë Kryesia e PD-së të bëjë të njëjtën gjë, por nga ana tjetër thotë se selia blu do ta vuajë deformimin e zgjedhjeve për Kryetar në të ardhmen. “Fakti që z. Basha ishte i përzgjedhur si pasardhës dhe shihet nga shumëkush si protektor i interesave politike të vetë z. Berisha, sigurisht që është problematik. Nëse z. Basha do të ishte zgjedhur si kryetar i PD-së pa përfshirjen e z. Berisha, them se ai do shihej si lideri i vërtetë nga çdo demokrat”, thotë Xhepa. Sipas tij, zgjedhjet në PD duhet të mos ishin kryer me kaq nxitim dhe drejtimin e partisë deri në zgjedhjet e reja, pas dorëheqjes së Berishës, duhet ta merrte Sekretari Përgjithshëm. Nga ana tjetër, ai ndihet i befasuar pse për humbjen e 23 qershorit kanë folur të gjithë, përveç strukturave dhe forumeve të PD-së.

Intervista e plotë http://www.shqiptarja.com/home/1/selami-xhepa-basha-protekto...

r.k