"Barbaria urbane e kryer nga dhënia e lejeve të ndërtimit", Rama: "Është koha që ky kapitull të mbyllet me forcë"

Kryeministri, Edi Rama gjatë mbledhjes së Këshillit Kombëtar të Territorit ka bërë të ditur se, “do të pezullohet dhënia e lejeve nga të gjitha autoritetet vendore, deri në paszgjedhjet e vitit 2015”.

Rama foli për një “barbari urbane të kryer nga dhënia e lejeve të ndërtimit e njësive vendore”, duke shtuar se ka ardhur koha që ky kapitull të mbyllet me forcë.
“Ne marrim përsipër si Këshill Kombëtar i Territorit, që në radhë të parë të fillojmë procedurat për rishikimin e planifikimit të territorit, me qëllim harominizimin e tyre në funksion të ndarjes së re territoriale, në funksion të krijimit të një kulture dhe përmbajtje ligjore, në funksionimin e autoriteteve për të autorizuar leje ndërtimi”, tha kryeministri.

“Kemi raste flagrante, vjedhjesh, të qindra lejeve që kanë sjellë plagë të panumërta. Për të kuptuar që pjesa më e madhe e lëshimit ka ardhur në periudhën e para dhe paszgjedhore. Do të pezullohet dhënia e lejeve nga të gjitha autoritetet vendore, deri në paszgjedhjet e vitit 2015. Sigurisht që ne nuk jemi këtu për të marrë vendim të njëanshëm për rrënim të mëtejshëm."

​Në këtë kuadër, kryeministri u shpreh se pezullimi nuk do të zbatohet për lejet e dhëna para këtij vendimi, ndërsa siguroi se të gjitha lejet do të verifikohen nga Agjencia Kombëtare e Territorit. Ai nënvizoi se të gjitha lejet që do të jepen pas këtij vendimi do të quhen të pavlefshme dhe do të shërbejnë si subjekt për ndjekje penale.
S.S