Banka e Shqipërisë: Besimi i shqiptarëve ndaj ekonomisë vazhdon të mbetet nën pikën e ngrirjes

Banka e Shqipërisë raporton se Treguesi i Ndjesisë Ekonomike (TNE) ra me rreth 1.3 pikë në tremujorin e dytë të vitit  2012. Prirja rënëse e TNE-së, është e regjistruar gjatë 3 tremujorëve të fundit rradhazi. Sipas Bankës së Shqipërisë, në rënien e TNE-së për tremujorin e dytë të vitit 2012, ndikoi keqësimi i besimit në të gjithë sektorët e ekonomisë. Kontributin kryesor në rënie e dha ulja e besimit konsumator, ulja e besimit në shërbime dhe ulja e besimit në industri. Në të njëjtin drejtim por në një masë më të ulët, veproi edhe rënia e besimit në sektorin e ndërtimit.

Duke iu referuar grafikut të publikuar në raportin e Bankës së Shqipërisë (shihni foton ose klikoni në nyjen http://www.bankofalbania.org/web/pub/analiza_e_rezultateve_vbb_vbk_t2_2012_web_4998_1.pdf) mund të konstatohet se pikën më të lartë TNE-ja e ka patur në tremujorin e dytë të vitit 2006 (116 pikë), ndërsa që prej tremujorit të parë të 2009-ës ka qenë nën nivelin e 100 pikëve, që konsiderohet si “pika e shkrirjes” për optimizmin. Niveli aktual i TNE-së (79.3) është ndjeshëm poshtë mesatares së tij afatgjatë, thekson raporti i Bankës së Shqipërisë.

E.Zaloshnja