Bamir Topi: Kur e ke shtëpinë me xhama, mos i gjuaj me gurë xhamave të komshiut

Bamir Topi e ka parë të udhës të marrë pjesë në programin ‘Kasketa’ të televizionit ‘A1 Report’ (është një program i Kastro Zisos), dhe biseda disi e padisiplinuar dhe e shthurur ka qenë e natyrës intime. Por aty Topi ka gjetur rast për të shprehur edhe qëndrime të një natyre tjetër. Fjala vjen, ka theksuar se Tirana tradicionale është çbërë, se prej saj kanë mbetur vetëm xhamia e Et’hem Beut dhe Kulla e Sahatit, se Tirana është bërë një metropol i madh, i rrëmujshëm e pa identitet, se po krijohet trekëndëshi urban Tiranë-Durrës-Krujë, se bashkimi me Kosovën është një kërkesë legjitime, por ata që bërtasin sot për këtë bashkim, e kanë mendjen tek votat, se femrat shqiptare janë më të bukurat në botë, etj., etj.

Në fund flet për përfshirjen e familjes së politikanëve në betejat politike, një fenomen i njohur në Shqipërinë e këtyre kohëve, dhe saktëson: “Kur e ke shtëpinë me xhama, është mirë të mos u gjuash me gurë xhamave të komshiut”. Dhe me këtë i fut një të pickuar Berishës (pa i përmendur emrin), që është marrë tërë kohën “në mënyrë vulgare” me familjet e të tjerëve, dhe tash e disa vjet po i duhet të përballet me sulmet që i janë bërë e po i bëhen familjes së vet.

M.N.