Balla ka vazhduar sot me premtimin e djeshëm që të bëjë transparencë për "Bllokun Blu"

Çfarë ndodh në “Bllokun Blu”? Shumë përflitet, shumë thuhet nën zë, por pak gjë dihet publikisht. Taulant Balla ka marrë një guxim të pazakontë për të denoncuar të bijën e Kryeministrit:

“Sipas saj çka Argita Berisha deklaroi në 2011-n, pasuria e saj u rrit me 210 milion e 784 mijë lekë gjatë vitit 2011. Papunësia në 2011-n arriti në 1 milion. Rritja ekonomike ishte 0. I vetmi që u rrit ishte korrupsioni. Në kulmin e krizës, vajza e kryeministrit ka shtuar pasuritë. Në Shqipëri nuk mund të gjejmë një person të tillë.

Vajza e kryeministrit paguhet sa zëvendëspresidenti amerikan Xho Bajden. Sipas zonjës Argita, në deklaratën pranë Inspektoratit të Lartë të Kontrollit dhe Deklarimit të Pasurive, ajo fiton 12 milionë në muaj nga mësimdhënia universitare. Po sa janë mësuesit që paguhen kaq? Një drejtor shkolle në Tiranë paguhet 600 mijë lekë në muaj. Pra Argita paguhet sa 20 të tillë së bashku.

Ky është sistemi i padrejtë që ka ngritur Sali Berisha. Meqë Berisha ka kohë që flet për bllokun dhe bllokmenët e rinj, ne nuk do të reshtim së treguari për bllokun dhe bllokmenët e tij”, tha Balla.

210 milion e 784 mijë lekë gjatë vitit 2011?? Ky standart, nëse është ashtu, a ka lidhje me Shqipërinë? K.C.