Avni Rustemi ndan LSI nga PD dhe PDIU

Sheshi me emrin “Avni Rustemi” duhet të mbetet me këtë emër. Ky ka qenë reagimi i LSI për debatin lidhur me riemërtimin e sheshit me emrin “Çamëria”. “Uroj që të jetë keqkuptim propozimi për heqjen e emrit të Avni Rustemi. LSI vlerëson lart figurën e Avni Rustemit. Ai shesh nuk mund të ketë emër tjetër. Ide të tilla konfliktuale nuk duhet të mbështeten, pasi sheshi është larë me gjakun e Avni Rustemit" - citohet nenkryetari i LSI nga mediat.

Nese keshilltaret e LSI nuk votojne pro heqjes se emrit, raporti i shumices ne Keshillin Bashkiak te Tiranes permbyset. PD dhe PDIU dalin ne minorance.

Propozimi për këtë emërtim është bërë nga kryetari i grupit të këshilltarëve të Partisë Drejtësi Integrim dhe Unitet (PDIU), Tahir Muhedini. Muhedini ka deklaruar se ai e ka propozuar emërtimin e këtij sheshi me emrin “Çamëria”, por nuk ka sqaruar se cilat kanë qenë arsyet përse është përzgjedhur ky shesh. “Po, e di që ai shesh e ka emrin ‘Avni Rustemi’. Nuk kam asnjë problem me figurën e Avni Rustemit, bile ai më duket se është çam,” ka deklaruar Tahiri.

Ndërkohë që, burime nga PDIU kanë sqaruar se ata thjesht kanë bërë propozimin që një shesh në Tiranë të mbante emrin “Çamëria” dhe se vendin nuk e kanë përcaktuar ata. Megjithëse ende nuk është dhënë verdikti nga ana e këshilltarëve në Këshillin e Bashkisë së Tiranës, kjo çështje ka ngjallur mjaft debate. Re.Pu.