Avancat "nacionaliste" të Berishës dhe një "përgjigje franceze" për mungesën greke

Kryeministri Berisha ka pritur sot në një vizitë zyrtare Kryeministrin e Sllovenisë Janez Jansa. "Të dy kryeministrat dhanë një konferencë të përbashkët për shtyp për të dhënë më shumë detaje për takimin. Kryeministri i Sllovenisë Jansa ndodhet që prej ditës së djeshme në Tiranë ku mbrëmë ka marrë pjesë edhe pritjen e presidentit Bujar Nishani - raporton faqja online e së përditshmes MAPO.
Në fjalën e tij në këtë takim Kryeministri reagoi edhe për anullimin e vizitës së Ministrit të Jashtëm grek, Dimitris Avramopulos si dhe të presidentit maqedonas, të ftuar për 100 vjetorin, por të kthyer rrugës.“Francezët kanë një përgjigje, miqtë shkëlqejnë gjithmonë me mungesën e tyre”, tha Berisha gjatë konferecës së përbashkët për shtyp në Tiranë me Kryeministrin e Sllovenisë Janez Jansa.

Berisha tentoi disa avanca "nacionaliste" duke përmendur Prevezën gjatë një fjalimi në Vlorë, por u tërhoq menjëherë me një deklaratë të dytë zyrtare disa orë më vonë. Tërheqja erdhi pasi Avramopulos anulloi vizitën dhe Ministria e Jahtme greke u shpreh zyrtarisht se arsyet lidheshin me deklarimet e Berishës.

Berisha e ka tentuar shpesh javët e fundit "rrëmbimin" e flamurit që mban në dorë prej muajsh Kreshnik Spahiu. Agjenia ANSA në një analizë të dy ditëve më parë e konsideronte këtë përpjekje të Berishës si tentativa për të luajtur me kartën e nacionalizmit në hyrje të fushatës elektorale të 2013. Analistë të ndryshëm në vend, thonë se eskalimi i papritur i retorikës nacionaliste nga Berisha ka të bëjë me rezultate sondazhesh që dëshmojnë se në veri të vendit dhe në Kosovë e Maqedoni, ku tema të tilla janë sensibël, kryeministri që rri në pushtet pas 2009-s falë votave të majta të LSI-së, ka pësuar firo të larta popullariteti. (a.th.)

Foto: Kryeministri Sali Berisha, ne perfundim te nje konference te perbashket shypi me homologun e tij grek Costas Karamanlis,  Prill 2009 (LSA)