Athinë, notë proteste për Përmetin, por pa përmendur fare thelbin e çështjes

Konflikti i Përmetit mes bashkisë dhe kishës ortodokse, ka sjellë një tjetër reagim nga qeveria greke. Ministria e Jashtme e shtetit fqinj, siç njofton TCH, ka thirrur urgjent ambasadorin shqiptar në Athinë, Dashnor Dervishi, për t’i paraqitur këtij të fundit një notë proteste. Në deklaratën për shtyp, Ministria në fjale dënon aktin e dhunës ndaj një qytetari grek dhe një minoritari, të ndodhura në Përmet, si dhe goditjen me gurë të konsullatës greke në Gjirokastër. Sipas selise së diplomacisë greke, këto dy akte të paprecedenta dhune kërcënojnë marrëdhëniet dypalëshe. Ndaj, thuhet në deklaratë, Athina kërkon arrestimin e menjëhershëm të autorëve dhe i bën thirrje qeverisë shqiptare të marrë masa të menjëhershme për normalizimin e situatës.

Aktet e dhunës padyshim duhen dënuar nga cilado anë që të vijnë. Megjithatë, do ishte me interes të dinim diçka: Ç’mendim ka qeveria greke mbi vendimet e gjykatave; duhen zbatuar ato? Po për ata që nuk i zbatojnë fjala vjen, verdiktet e gjyqësorit grek, ç’parashikojnë ligjet greke?

a.k