Artan Lame, tregon me gisht një person për rrënimin e trashëgimisë kulturore, e që mbron shkatërrimin e planit të ri urbanistik...

Artan Lame, një nga aktivistët e angazhuar më së tepërmi kundër Planit urbanistik kriminal të miratuar vetëm me votat e PD në Bashkinë e Tiranës, në kolumnen e tij të përjavshme te gazeta Shqip, të titulluar “Shqipni Tavolinash” shprehet se ka shumë krime që bëhen, e që mund të kthehen mbrapsht, edhe pse me kosto. Rrugët e ndërtuara me tendera fiktivë e groshët e vjedhura nga dietat e konviktorëve, si dhe shumë të tjera, me një invesitm shtesë ose me emancipimin e shoqërisë, mund të riparohen. Por, ajo që nuk vjen më është trashëgimia kulturore. “Të lejosh të shkatërrohet një monument kulture, apo më keq akoma, të vësh firmën vetë për ta shkatërruar, është një e keqe pa kthim”

Një kolumnist që përgjithësisht nuk merret me individë, ai ka vendosur të ngrejë gishtin tek një njeri që po justifikon masakrën, drejtori i Institutit të Monumenteve, Apollon Baçe.

Shkruan Lame:

“Kur zoti Berisha vendosi të prishë Piramidën, e vetmja pengesë ligjore ishte fakti që ajo ishte vënë nën mbrojtje që në vitin 2000. Për më tepër, në vitin 2007 vetë Apolloni e kishte shpallur sërish monument kulture atë objekt, ndërsa tani, tre vjet më pas, prapë po vetë ai doli t’i hiqte statusin dhe pa pikë turpi të deklaronte se Piramida ishte objekt pa vlerë...

Ca vjet të shkuara, në Shkodër, me dijeninë e plotë të Apollonit u lejua të shkatërrohej një monument kulture, i cili më pas u zëvendësua me pallate, duke i hapur kështu rrugën shkatërrimit të një blloku të tërë të Shkodrës së vjetër. Direktori tha se objekti ishte pa vlerë. Pastaj, para dy vjetësh në hyrje të Shkodrës u zbuluan pjesë të kolektorit mesjetar të kullimit të ujërave të qytetit dhe, ndërsa ne të gjithë u shkulëm atje dhe u përpoqëm ta shpëtojmë atë zbulim unikal për të gjithë vendin, i vetmi që deklaroi se zbulimi ishte pa vlerë ishte Apolloni, duke e dënuar kështu me vdekje kolektorin dhe urën hyrëse të qytetit, të cilat u zhdukën nën thonjtë e ekskavatorëve...

Pastaj i erdhi radha shatërvanit në Lulishten e Parlamentit në Tiranë. Ndërsa u shkatërrua pa mëshirë (...) i vetmi që doli kundërrymë, ishte … e kush tjetër përveçse Apolloni. Objekti nuk ka asnjë vlerë, deklaroi.

Pastaj u erdhi radha kullave të fortinove dhe rrethimit të Pallatit të Brigadave. (...) aq shumë zhurmë bëmë sa edhe vetë Berisha u detyrua të deklarojë se rrethimi duhej çmontuar me kujdes dhe të rindërtohej identik. E tha Saliu sa për të larë gojën ndoshta, por prapë doli Apolloni kobndjellës dhe deklaroi përsëri se rrethimi ishte pa vlerë dhe nuk duhej ruajtur...

Pastaj erdhi radha e Shtëpisë së Flamurit në Korçë, e cila u shemb me një pakt të fshehtë: ju prisheni, ne s’do themi gjë. Shtëpia muze u shemb, por pakti nuk funksionoi, vetëm sepse pas rrënimit të saj u ngrit një opinion i tërë për të kërkuar rindërtimin e saj. Prapë i pari që doli në media ishte Apolloni, që deklaroi se godina ishte pa vlera arkitektonike dhe nuk ia vlente të mbahej...”

k.c.

Artikulli i plotë:

http://gazeta-shqip.com/lajme/2012/12/29/pune-te-pista/