Ardian Ndreca sheh rrezikun e instrumentalizimit të gegnishtes

Ardian Ndreca është nga të paktët publicistë shqiptarë, që shkruan në gegnisht (“në respekt të drejtshkrimit të gegnishtes letrare të vitit 1964, të aprovuar në Kosovë”, saktëson ai). Në Mapon e sotme ish një artikull i tij mbi gegnishten me titull “Rreziku i instrumentalizimit të gegnishtes”, dhe këtë e bënte në përgjigje, apo në vijim, të debatit të hapur së fundmi për shkak të disa sugjerimeve për ndryshime në standardin e shqipes të bëra nga disa akademikë të Tiranës e të Prishtinës. Ndryshimet e propozuara, sidomos në formën që u lajmëruan nga scoop-et e stisura mediatike, provokuan një si shock tek mbrojtësit e standardit, por Ndreca vetë është krejt i pakënaqur me drojën e gjuhëtarëve për “të njohur ndryshimet sociologjike të gjuhës shqipe gjatë njëzet viteve të fundit”. Ai çmon “ndonji përpjekje gjysëm institucionale për me ngjallë debatin rreth gegnishtes”, por – thotë ai  - “un jam i primë mos i besue atyne që me fjalë e mbrojnë gegnishten por shkruejnë në nji standard me dopiopet të mbërthyem deri në fyt”.

Një nga këta është Kolec Topalli, i cili, vazhdon Ndreca, “ka dalë me tezën e disa ndryshimeve në përdorimin e zanores -ë- në nji tipologji të caktueme fjalësh”. Këto ndryshime Ndreca, jo vetëm i konsideron të pamjaftueshme, por lë të kuptohet se janë si të pilotuara politikisht;. Ja ç’thotë saktësisht ai: “Entiteti i ndërhymjes ishte krejtsisht i papërfillshëm në kandvështrimin e nevojave që paraqet sot standardi, por i mjaftueshëm me heq vemendjen prej problemeve urgjente politike që kemi dhe sidomos për me shtërngue rradhët e nji elektorati të lodhun e të zhgënjyem veriorësh që e kanë pa tashma dështimin total të politikës së Berishës.”

Për ta lexuar të plotë shkrimin e tij, ndiqnin linkun: http://www.mapo.al/2012/07/11/rreziku-i-instrumentalizimit-t...

M.N.