Apeli zbardh “vendimin” për 21 Janarin: Vrasje pa dashje sepse nuk njiheshin (Ç’mund të thuhet për terroristët?!)

Gjykata e Apelit ka zbardhur vendimin për çështjen e 21 Janarit, të dhënë dy ditë më parë. Apeli dënoi me një vit burg Ndrea Prendin, ish- komandant i Gardës, dhe me tre vjet burg Agim Llupon, ish- gardist, duke i akuzuar për vrasje nga pakujdesia.

“Ka rezultuar e provuar se protestuesit e dhunshëm janë paralajmëruar që të shpërndahen, por ata nuk janë bindur,” thuhet në vendim. “Efektivët e Gardës, pas paralajmërimit dhe mosbindjes së protestuesve, nuk kanë qëlluar as duke synuar pjesët e poshtme të trupit të protestuesve dhe as drejtpërdrejt mbi ta, por në ajër,” thekson vendimi, duke mbajtur kështu në këmbë versionin e plumbave rikoshet, të shpërndarë nga ish- kryeministri Sali Berisha.

Gjykata shkon më tej kur thotë se asnjë nga viktimat nuk po tentonte të hynte në Kryeministri, ndaj vrasja e tyre nuk mund të ishte me dashje. “Nuk është provuar se i pandehuri Ndrea Prendi ka dashur të vrasë pikërisht viktimën Faik Myrtaj, ndërkohë që nuk kishte asnjë njohje dhe ndonjë motiv për këtë,” thekson gjykata. Madje sipas tyre: “Vetëm një person i papërgjegjshëm nga ana mendore, pra i papërgjegjshëm përpara ligjit, mund të kryejë vrasje me dashje direkte pa pasur asnjë motiv”.

Ç’mund të thuhet vallë për terroristët? A janë ata të pafajshëm sepse vrasin njerëz që “më parë nuk i kanë njohur”?!