Antoninjtë i nxjerrin në rrugë

Çështja e kthimit të banesave ish-pronarëve ka prekur edhe familjen Antoniu që i ka dhënë kulturës shqiptare tre artistë të shquar. Enis Pekmezi, trashëgimtari i koleksionit të veprave të artit të familjes Zengo-Antoniu më 18 nëntor duhet të lerë shtëpinë që i kthehet ish pronarit – sipas një raportimi të gazetares Elsa Demo në numrin e sotëm të së përditshmes Shekulli.

Shkruan Demo: “Apartamenti i parë me portë të gjelbër, mban emrin e atij që ka hyrë i pari në vitin 1943. Ishte, as më shumë e as më pak, se Kristaq Antoniu me nusen e tij të re, që ishte dhe ajo, as më shumë e as më pak se Androniqi Zengo. Kristaq Antoniu (1907-1979) kishte bërë emër si aktor i periudhës së parë në kinemanë rumune, po edhe si tenor. Androniqi, piktorja e parë shqiptare, kishte hapur ekspozita në Korçë e Tiranë, dhe karriera e saj veç krijimtarisë u bë mësimdhënia në shkollat femërore të dy qyteteve. Ndërsa djali i tyre, prof. Gjergj Antoniu, violonçelist, ishte i fundit që doli prej këtej, i ndjerë. Porta hyrëse ka një të çarë horizontale që ka shërbyer për postën. Suvaja e rënë ka krijuar harta në fasadë. Banori i vetëm dhe njohës i kësaj shtëpie sot është Enis Pekmezi, nip nga linja e nënës. Enisi erdhi këtu 5 vjeç. Tani është një burrë që sapo ka dalë nga zia. Daja i tij, Gjergj Antoniu (1949-2012) ndërroi jetë në shtator... Më 18 nëntor Enis Pekmezi duhet të ketë dalë se s’bën nga shtëpia e të marrë me urgjencë një tjetër me qira. Duhet t’i ketë paketuar 700 korniza me vepra arti dhe koleksionin 40-vjeçar të partiturave shkruar me dorë nga prof. Antoniu. Këto janë trashëgimia e tij.   Mund t’i çojë në azil këto vlera ministri Olldashi?” (A.N.)

Demo e plotë:

http://shekulli.com.al/web/p.php?id=7673&kat=94