Ambientet e Kryeministrisë së Berishës, një shëmti, një kaos i vërtetë nën rrogoz

Gazeta Shqiptarja.com boton një reportazh të shkurtër ku është “fotografuar” gjendja e ambienteve të Kryeministrisë në ditën e parë kur vuri këmbën Kryeministri Rama. Reportazhi shoqërohet me një kolazh fotosh, siç thuhet, të hedhura dhe të bëra publike nga vetë Rama.    

E vetmja që paraqitet pa të metë në kolazhin e fotove është zyra e ish-kryeministrit Sali Berisha. Por përtej korridorit dhe sallës elegante, ku Berisha priste gjithë të ftuarit, e cila shkëlqente deri ditët e fundit dhe të bënte të imagjinoje përsosmërinë në çdo detaj në ngrehinën simboli numër 1 i shtetit, në fakt brenda kontrastonte krejt e kundërta.

 Rrakatina, mure të mykura, pllaka të thyera, tela elektrike të zhveshura, satelitë të ndryshkur, kolltukë e tavolina - stereotipe të mobiljeve komuniste, kënde e qoshe si mos më keq deri dhe lecka pastrimi shuk e sandale me taka kthyer përpjetë. Edhe bojë pikturash, por e pikuar në dysheme. Një kaos i vërtetë "nën rrogoz". Një shëmti, që natyra si Rama nuk mund ta përballojnë dot. Siç ka treguar më së miri e shkuara e tij. Siç ka bërë sapo u vu në krye të Ministrisë së Kulturës, Rinisë dhe Sporteve në vitin 1999. Së pari Edi Rama rikonstruktoi ndërtesën dhe zyrat. U përgojua për bojën e kuqe “si bordello” me të cilën leu muret e brendshme, por Rama përsëri vazhdoi. Ashtu i ndërroi krejt faqen Bashkisë së Tiranës, e cila prej paraardhësit Brojka më tipiken kishte erën e keqe të përhershme të tualeteve sapo futeshe tek dera e saj, pa përmendur të tjerat, tërësisht të vjetruara dhe zymta, shkruhet në gazetën e mësipërme.

Zh.