Ambasadori Banaj, shkarkohet. Askush nuk merr mundimin të na sqarojë “pse”

Admir Banaj është shkarkuar nga detyra e ambasadorit të Shqipërisë në Arabinë Saudite, bën të ditur Top Channel, lajmi tashmë po përcillet në të tëra mediumet. Banaj u bë i njohur para pak kohësh, kur deputeti Taulant Balla publikoi një korrespondencë mes tij dhe biznesmenit Zafar Ansar.
Sipas Top Channel, Ministria e Jashtme, me një shkresë drejtuar Presidentit të Republikës më 11 dhjetor 2012 i kërkonte kreut të shtetit, shkarkimin nga detyra të ambasadorit Banaj, dhe 9 ditë më pas ai e ka firmosur. Data e kërkesës për shkarkim drejtuar presidentit Nishani përkon me momentin, kur për herë të parë opozita e akuzoi ambasadorin Banaj se kishte shpërdoruar detyrën duke u kthyer në një sekser mes biznesmenti Zafar Ansar dhe zyrës avokatore të Argita Malltezit. Pak ditë më parë, në një intervistë për Top Chanel, vetë biznesmeni Ansar tha se ambasadori Banaj ishte ndërmjetësi mes tij dhe studios së vajzës së kryeministrit për të vijuar tratativat e ndërtimit të një TEC-i prej 100 milionësh.

Ministria e Jashtme mban përgjegjësi për të sqaruar opinionin publik jo vetëm mbi veprimet e funksionarit të saj, por duhet të sqarojë publikisht arsyet e shkarkimit të një diplomati, tashmë të përfolur. Gjë,që nuk ka gjasa ta shohim, duke pasur parasysh standartin e (mos)transparencës së shtetit shqiptar me publikun që i mban me bukë (se me vila, makina e prona, mbahen vetë). K.C.