Ali Ahmeti do të largohet nga qeveria? “Jemi gati të flasim”, thotë Menduh Thaçi

Partia maqedonase VMRO-DMNE ka futur për diskutim e miratim në Parlament një ligj që njeh kompensimin e shpërblimin e anëtarëve të Forcave të Armatosura në konfliktin e brendshëm ndëretnik të vitit 2001, dhe ky fakt ka zemëruar aleatët e tyre shqiptarë, dmth partinë BDI të Ali Ahmetit. “Ok”, thonë këta të fundit, “por le të bëjmë ca amendamente që njohin të njëjtën gjë dhe për ushtarët e UÇK-së e për familjet e viktimave shqiptare gjatë asaj lufte”. Mirëpo gjasat që të bihet dakord mbi amendamente të tilla janë pothuaj zero, e prandaj e gjitha kjo ka hapur një spirale krize në gjirin e maxhorancës. “Nëse miratohet ky ligj pa amendamentet, atëherë do të kalojmë në zgjedhje”, është thënë nga njerëz të Ahmetit.

Menduh Thaçi, i pyetur në këtë situatë mbi një takim të mundshëm mes tij e Ahmetit, është përgjigjur: “Unë do t’i mbështes përpjekjet e BDI-së për ta parandaluar miratimin e këtij ligji shumë të keq, dhe nëse ata mendojnë se ky proces mund të bllokohet nëpërmjet zgjedhjeve të parakohshme, jam i gatshëm që të ulemi dhe të bisedojmë, të shohim se si të dalim prej kësaj situate”.

Takimet mes Ahmetit e Thaçit janë një gjë e rrallë, shumë e rrallë, dhe kjo “hapje” për t’u ulur e për të biseduar të bën përshtypje. Ca ditë më parë, ditën e funeralit të Arbën Xhaferit, Ali Ahmetit iu tha ‘jo’ pas kërkesës së tij për të marrë pjesë në atë ceremoni, gjë që bëri shumë përshtypje.

Re.Pu.