Administratori i Milanit: “kemi një portier m…ti”

Adriano Galliani, administratori i Milanit, është shprehur shpesh herë se gjatë javës është një tifoz i kuqezinjve, ndërkohë që gjatë ndeshjeve në fundjavë transformohet në një ultras. Si çdo tifoz i zjarrtë mund ti shpëtojë edhe ndonjë fjalë e tepërt, por të shtunën në darkë,  në stadiumin S. Paolo të Napolit, kamerat filmuan disa shprehje që nuk i kanë hije një prej drejtuesve më të rëndësishëm dhe më me eksperiencë të futbollit italian.

Pas pësimit të golit të parë si rrjedhojë e një gabimi të portierit Abbiati, Galliani bërtiti në tribunën e nderit: “kemi një portier m…ti!”.  Të dielën, i ndërgjegjshëm për gafën e kryer përpara miliona telespektatorëve, Galliani mori në telefon Abbiatin dhe i shprehu keqardhjen e tij, duke e siguruar që ato fjalë ishin zëmërate dhe jo të menduara. “Në asnjë rast nuk shprehin vlerësimin që kam për ty”, mendohet të jetë shprehur administratori milanist.

Nuk zgjati shumë edhe reagimi i portierit i cili po të dielën, në nje intervistë në Milan Channel, pranoi apologjinë e punëdhënësit dhe tha që “Galliani për mua është si një baba. Njihemi prej 15 vitesh dhe për sa më përket ky problem nuk egziston. Galliani më shpjegoi një episod për të cilin as më intereson.” (E.X.)