'97-a komplot komunist grek? Njerëzit evoluojnë - thotë ambasadori i ri i Shqipërisë në Britaninë e Madhe

Mal Berisha, do të jetë ambasadori i ri i Shqipërisë në Britaninë e Madhe. Për këtë arsye, ai është marrë në pyetje gjatë ditës së djeshme në Komisionin e Politikës së Jashtme. Mal Berisha ka shkruar së bashku me Edit Harxhin (aktualisht zv.ministre e Jashtme) për ngjarjet e vitit 1997, ku e cilësonte atë që ndodhi si "një komplot komunist-grek". E perditshmja SHQIP raporton se ai u pyet dje nga një deputet i Komisionit, nëse u qendron ende këtyre deklaratave. “Atë kohë që e kam shkruar kanë qenë rrethana të tjera, njerëzit evoluojnë. Nuk e takoj tamam atë shkrim në ditët e sotme”, ishte përgjigjia e tij.

"Sakaq, prej kohësh është bërë publike se Ministria e Jashtme është kthyer në një çerdhe për punësimin e fëmijëve të qeveritarëve. Të tillë janë emërimet e dhëndrit dhe vëllait të kryeparlamentares Topalli, në Francë dhe në Itali. Deputetët e tjerë të PD-së apo politikanë, si Aldo Bumçi, Sherefedin Shehu, Rajmonda Bulku, Jemin Gjana, Gert Bogdani, Ilir Bano dhe Neritan Ceka kanë fëmijët apo të afërmit e tyre të punësuar në Ministrinë e Jashtme ose në shërbimin diplomatik, - shkruan “SHQIP”. a.n.