12 të afërm të viktimave në 21 Janarit, në seancën e Kuvendit. Por ata presin më shumë

Dymbëdhjetë persona, të afërm të viktimave të protestës së 21 janarit, Ziver Veizi, Aleks Nika, Hekuran Deda dhe Faik Myrtaj, ishin të pranishëm sot në seancën e parë të Kuvendit të ri. Ata i ndoqën punimet e seancës së shkurtër nga lozha e të ftuarve, ndërsa poshtë në sallë ishin mbledhur të 140 deputetët e parlamentit të ri, mes të cilëve Edi Rama dhe Sali Berisha. Ftesa afërmendsh ishte e Partisë Socialiste dhe vetë kryeministrit të ri, ndërsa gjesti në fjalë është kuptimplotë. Edhe gjatë fushatës, edhe pas zgjedhjeve, Rama i ka siguruar familjarët e viktimave se nuk i ka braktisur dhe do bëjë ç’ka në dorë që drejtësia të vihet në vend. A ka ndjerë ndonjë siklet kryeministri i dorëhequr Berisha, këtë nuk mund ta dimë, por padyshim tek të afërmit e të katëtrve, mund të flitet për ndjesi respekti që u është bërë, por kurrsesi triumfi. Sepse siç tha për Temën Mark Nika, “është një gjest fisnik, megjithëse ne presim që kjo qeveri, dhe sidomos Edi Rama, të mbajë premtimin dhe të zbardhë autorët e vrasës së Aleksit dhe tre burrave të tjerë në bulevardin përballë kryeministrisë ku ishte Sali Berisha. Ne presim që kryeministri Rama të vërë drejtësi”.

a.k