110 milionë euro për 4 hidrocentrale

Në Shqipëri, shoqëria turke Kurum duket se është favorite për blerjen e katër hidrocentraleve të vegjël, Bistrica 1 dhe Bistrica 2 në jug të vendit dhe Shkopet e Ulëz në veri. Në dy gara të zhvilluara vecmas e ku morën pjesë 7 kompani dhe konsorciume të huaja dhe vendase, Kurum dha dje ofertën më të lartë, me një total prej afër 110 milionë euro për të 4 hidrocentralet. Vendimi përfundimtar për vlerësimin e ofertave do të merret në përfundim të verifikimit të dokumentacionit. Katër hidrocentralet kanë një kapacitet prodhues të barabartë me afër 5,3 përqind të totalit të prodhimit vendas

Procesi për privatizimin e katër hidrocentraleve Bistrica 1 dhe 2, si dhe ai i Shkopetit dhe Ulëzës ka nisur që në fundin e vitit të kaluar kur në parlament u paraqit dhe projektligji i vecantë që i shkëpuste ato nga pronësia e Korporatës energjitike. Deri më tani janë zhvilluar disa gara. Në qershor përpjekja e parë u anulua për shkak se ofertat e paraqitur ishin të ulta. Gara tjetër e parashikuar në gusht u shty sepse kompanitë e interesuara kërkuan më shumë kohë, ndërsa në shtator nuk pati asnjë ofertë.

Këtë herë hidrocentralet u paraqitën për shitje të grupuara 2 e 2.Bistrica 1 dhe Bistrica 2 së bashku, e po ashtu hidrocentrali i Shkopetit u ofrua së bashku me atë të Ulëzës. Interes më të madh pati për hidrocentralet Bistrica 1 dhe 2, ku u paraqitën 7 oferta nga kompani amerikane, turke, italiane, boshnjake, greke dhe shqiptare. Oferta më e lartë ishte ajo e kompanisë turke Kurum, prej 52 milion eurosh. Ishte sërish po kjo kompani që paraqiti ofertën më të lartë, prej 57,5 milion eurosh edhe për dy hidrocentralet e tjera, për të cilat në garë ishin 4 shoqëri.

Opozita nga ana e saj e ka kundërshtuar këtë privatizim duke e quajtur të pavend nxjerrjen në shtije të ndërmarrjeve të cilat janë fitimprurëse duke shtuar se me këtë akt do të rëndohej edhe më shumë situata financiare e Korporatës energjitike. VOA