“Strawberry Frog APCO”, kompania fituese që do kurojë imazhin e Shqipërisë në botë

“Strawberry Frog APCO” është kompania e njohur ndërkombëtare e cila do të kurojë imazhin e Shqipërisë në arenën ndërkombëtare. Juria ndërkombëtar ka shpallur këtë kompani sot si të denjë për këtë qëllim, me platformën më të mirë të paraqitur. “Strawberry Frog APCO” ka qendrën e saj në Nju York në SHBA.

Kompania fituese u shpall nga ministrja e Zhvillimit Urban dhe Turizmit, Eglantina Gjermeni. Kompania do të veprojë me sloganin “Albania-Go your own way! Projekti i “Branding Albania” do të ndërtojë një platformë imazhi për ta përhapur kudo në botë, një imazh që reflekton energjinë dhe vitalitetin e popullit tonë, potencialin e madh për zhvillim, traditën e mikpritjes, kulturën e pasur dhe trashëgiminë e jashtëzakonshme historike, vendet dhe peizazhet e mrekullueshme.

Nisma lindi si një nevojë për të rritur numrin e turistëve, të huaj sidomos, por edhe për të rritur investimet e huaja në vend. Finalistët e garës së sotme ishin CNN, Hemington , Interface Tourism Group, MEC Medianetwork  dhe StrawberryFrog APCO .

Lista e 5 propozimeve më të mira, mes 38 propozimeve të dorëzuara u vendos nga një Juri Ndërkombëtare e përbërë nga 7 anëtarë, të cilët janë: Alastair Campbell, Rana Nejem, Paavo Pettai, Christiphe Ginisty, John Kester, Mimoza Kusari Lila dhe Eglantina Gjermeni. Ndërkohë, që Juria Finale, në datën e sotme kishte 9 anëtarë, mes tyre gazetarin e njohur Bruno Vespa dhe Ahmed Obaid Al Mansoori.

S.S