“Nuk arrij ta shpjegoj se si mund të arrijë një ministër të shpifë kaq shumë e kaq keq” - thotë Fehmi Abdiu për Olldashin

Në një intervistë të sotshme për ‘Telegraf’ ish-Kryetari i Gjykatës Kushtetuese Fehmi Abdiu shprehet se “Akti Normativ i qeverisë për lirimin e Banesave, është veprim kundër Gjykatës Kushtetuese” dhe diskriminon familjet që banojnë në ato banesa.

Në lidhje me fjalën e Ministrit Olldashi gjatë debatit parlamentar për aktin normativ “Për lirimin e banesave të ish-pronarëve”, Abdiu thotë: “Unë jam i çuditur se kam dëgjuar ndër të tjera Ministrin Olldashi që ishte pregatitur ‘mirë’ me shpifje dhe mjaft trillime, për të sulmuar e dëmtuar kundërshtarët e tij dhe eksponentët e të majtës. Ai është shprehur se mua, PS-ja, që ishte në pushtet kur unë isha Kryetar i Gjykatës Kushtetuese, më kishte vendosur në një banesë të ish-pronarëve. Më përmendi mua, siç përmendi dhe mjaft emra të tjerë, që i quajti ish-bllokmenë, partiakë, etj. Nuk arrij ta shpjegoj se si mund të arrijë një ministër të shpifë kaq shumë e kaq keq. Para së gjithash, në vitet kur Gj. Kushtetuese ka shfuqizuar ligjin në fjalë, unë NUK kam qenë anëtar i Gj. Kushtetuese”.

Z. Abdiu, thotë se “unë NUK kam qenë asnjëherë në banesë pronë e pronarëve të këtillë”. Ndër të tjera, ai i kërkon Ministrit të bëjë autokritikë në emër të ministrisë dhe të Kryeministrit si dhe Gjykatës Kushtetuese të gjejë kurajën t’i shfuqizojë sërish disa dispozita të këtij ligji.

Po sot, shqiptarja.com solli dhe një shkrim ku fëmijët e ish-ministrit të ndërtimit në kohë të komunizmit, Rrahman Hankut (të përmendur në fjalën e Z. Olldashi) pretendojnë se “Ministri gënjeu”. Të akuzuar se kanë marrë pjesë në protestën kundër miratimit të aktit normativ, për lirimin e shtëpive të ish-pronarëve, ata citohen se “ka 12 vjet që e kemi liruar shtëpinë” dhe e konsiderojnë deklartën spekulative dhe të pavërtetë. “Nuk është e vërtetë që kemi marrë pjese në protestë, sepse ashtu si dhe Rrahman Hanku e quajmë këtë ligj të drejtë dhe madje të vonuar”, citohen ata nga shqiptarja.com.

K. Cukali