“Medalja e Mirënjohjes” për Vito Kapon. Dekorata e Qeverise kalohet në heshtje

Dekorohet Vito Kapo, qeveria i jep “Medaljen e Mirënjohjes” ish-ministres së Enver Hoxhës. Me këtë titull është hapur sot e përditshmja “Gazeta Shqipitare”. Megjithatë nuk ka pasur asnjë ceremoni me këtë rast duke e lënë të kalojë në heshtje. Ish-anëtarja e Komitetit Qendror të PPSH-së, Vito Kapo është dekoruar nga qeveria me “Medaljen e Mirënjohjes” për kontributin si pjesëmarrëse në luftën për Çlirimin e atdheut nga pushtuesit nazi-fashistë. Lajmi është pohuar për “Gazeta Shqiptare” nga e veja e Hysni Kapos, ish-udhëheqësit të lartë komunist, e cila, sipas artikullit në fjalë, falënderon hapur ekzekutivin e në veçanti ministren e Mbrojtjes, Mimi Kodheli për vlerësimin. “Më në fund dikush u kujtua edhe për ne. Padyshim ndihem shumë e gëzuar dhe gjej rastin nëpërmjet kësaj mundësie që më jepni ju që të falënderoj qeverinë dhe në veçanti ministren e Mbrojtjes”, – shprehet Vito Kapo, ish-ministre e Industrisë së Lehtë në kohën e Enver Hoxhës dhe të Ramiz Alisë. “Gazeta Shqipitare” shkruan se dekorimi i saj është bërë pa bujë. Madje siç pohon edhe vetë Kapo, “Medalja e Mirënjohjes”, i është dërguar në shtëpi me postë, pa ndonjë ceremoni zyrtare.

L.V