“Kauza” e Obeliskut zbret në bazë. Kreu i PD-së, Cara: “Prishja, epsh antidemokratik”. Roshi: “Monumenti i ri, nuk është parë në rruzull”

Në emisionin “Tonight Ilva Tare” është diskutuar për çështjen e obeliskut të prishur në Kavajë, monument që imitonte dy gishtat, simbol i demokracisë, por edhe i demokratëve. Emisioni është zhvilluar me të dyja palët të pranishme, krerët e PD-së në Kavajë nga njëra anë dhe kreu i Bashkisë Elvis Roshi nga ana tjetër. “Gjaku i larë dhe nga etërit e këtyre që janë sot në pushtet ka bërë të mundur që irritimi i qytetarëve të Kavajës të jetë në shkallën maksimale. Kavaja simbolin e saj nuk ia fal jo Edi Ramës, por askujt. Akt vandal në mënyrë të njëanshme i kryer nga kryeministri Edi Rama. Ndërkohë që i shtrin dorën opozitës për të qenë pjesë e parlamentit, në anën tjetër shemb Obiliskun në mënyrë vandale. Ne protestojmë për pabesinë dhe urrejtjen që ka Kryeministri Rama. Nuk është vrarë vetëm Kavaja, por gjithë demokracia. Këta kanë një epsh të shfrenuar ndaj demokracisë dhe veprimeve liridashëse të qytetarëve”, është shprehur kreu i PD-së së Kavajës, Engjëll Cara. Nga ana e vet është përgjigjur kryebashkiaku Elvis Roshi, i cili ka deklaruar se çështja po politizohet qëllimisht. “Qendrën e Kavajës e ka miratuar Këshilli Bashkiak, është qëndër moderne me infrastrukturë europiane. Dy gishtat u kthyen në një rrezik dhe për fëmijët e Kavajës pasi kolovateshin, në shumë raste dëmtuan edhe gjymtyrë. Unë nuk e kuptoj këtë protestë. Qytetarët janë të lirë, jemi në demokraci sot. Protesta nuk ka lidhje me sheshin, nuk e kuptoj këtë protestë dhe çfarë kërkojnë. Por nuk duhet të ngatërrojmë politikën me zhvillimin e qytetit tonë. Ku ishin dy gishtat do kemi një shatërvan shumë të bukur. Është diçka që do jetë në të mirë të qytetit. Këshilli bashkiak para muajsh vendosi 5 milionë lekë për të hapur një konkurs për të bërë monumentin e demokracisë në qëndrën e re që do ta inagurojmë me 26 mars të vitit që vjen. Do ta vëmë përballë dy gishtave, demokracia nuk është se humbi. Monumenti do jetë shumë i bukur, prej bronzi. Do jetë një monument madhështor që nuk është parë në rruzullin tokësor. Ne nuk flasim, bëjmë punë. Nga viti 2011 në Kavajë ka një zhvillim të madh. Gjithë Qeveria e ka mendjen në Kavajë. Sheshi i Kavajës është një investim i qeverisë. Kavaja do jetë një ndër qytetet më të bukura të Ballkanit. Bashkia dhe kryetari i Bashkisë nuk e harron gjakun e dëshmorëve të derdhur për demokraci. Një nga ata jam dhe unë dhe nuk është ai zotëria aty në panel”, tha Roshi.

http://www.oranews.tv/vendi/kavaja-ne-proteste-per-dy-gishtat-roshi-po-p...

s.z