“Gratë në të Zeza” të Serbisë, kundër alienit Strauss Kahn: Për çfarë do na këshillojë ky imoral?

Ka “Burrat në të Zeza”, por ka edhe “Gratë në të Zeza”. Të parët ndjekin alienë armiqësorë në mendjet pjellore të skenaristëve të Hollivudit, por të dytat janë reale, dhe jo larg nesh. Një organizatë jo- qeveritare në Serbi me këtë emër, që përfaqëson të vejat e luftës, ka reaguar ndaj lajmit se ish- shefi i Fondit Monetar Ndërkombëtar, Dominique Strauss- Kahn është caktuar si këshilltar i qeverisë, raporton BIRN. “Gratë në të Zeza”, proteston se ky është një akt imoral, duke patur padyshim bëmat dhe famën mbarëbotërore të DSK-së.

“Ne besojmë se është një akt thellësisht imoral, që përhap kulturën e dhunës mashkullore kundër grave dhe promovon pandëshkueshmërinë për krimet seksuale”, thuhet në deklaratën e kësaj organizate. Strauss- Kahn u arrestua në Nju Jork në vitin 2011, pasi pastruesja e një hoteli e akuzoi se e kishte sulmuar seksualisht. Akuzat ndaj tij u rrëzuan, por ai tani përballet sërish me hetimet në Francë, pasi dyshohet se qëndron pas një rrjeti prostitucioni.

a.k