“Denoncime” biografike në parlamentin e Kosovës

Në parlamentin e Kosovës është zhvilluar një debat mes kryeministrit Thaçi e të parit të Vetëvendosjes, Albin Kurti. Ka rënë në sy se Thaçi, në stilin e ndonjë sivëllai të Tiranës, ka bërë një “denoncim” biografik. Në fillim ishte Kurti që nënvizoi se “kryeministri ngre flamurin kombëtar në Tiranë, por nuk guxon ta ngrejë në kufirin Kosovë-Serbi”. Dhe pikërisht në këtë moment ka ndërhyrë kryeministri Thaçi, e ka thënë se “Kurti, nëse është patriot, duhet të shkojë ta ngrejë flamurin në Vlladimir të Malit të Zi, pasi atje është vendlindja e tij”.

Me këtë rast, na kanë dhënë dhe një leksion në lëmë të gjeografisë së trojeve shqiptare, dhe në lëmë të toponimeve historike. “Atij vendi nuk i thuhet Vlladimir por i thuhet Katërkollë”, ka sqaruar Kurti, dhe ka shtuar se “as ai e as babai i tij nuk e kanë vendlindjen atje”. “Unë kam lindur në Prishtinë”, ka saktësuar Kurti.

Dhe Thaçi i është drejtuar pas kësaj: “Kurrë nuk e përmendët vendlindjen tuaj. Ai që e mohon vendlindjen e vet, e mohon edhe kombin e vet”. Nuk mundi të na thotë se ç’të keqe ka të jesh nga Vlladimiri (Katërkolla, sipas Kurtit), pse Kurti paska patur interes ta fshehë këtë fakt, e nëse nuk ka të keqe, pse do duhej përmendur.

Re.Pu.