Është ndarë papritur nga jeta Alfred Kola, bashkëpunëtori i hershëm i Respublica-s

Një javë më parë, saktësisht më datë 14 të këtij muaji, ka ndërruar jetë Alfred Kola, një nga bashkëpuntorët e gazetës online respublica.al. Njoftimi i trishtuar na vjen nga njerëz të afërt të tij.

Alfredi na u ofrua qysh në fillim me idenë për të kontribuar në këtë faqe “të re e ndryshe”, dhe përveç artikujve e opinioneve të tij mbi plot çështje të jetës social-politike shqiptare, ai na dha një dorë të mirë në mbulimin e rubrikës Global View. Praktikisht, ai e ka mbajtur fare i vetëm atë rubrikë. Dhe e ka bërë në mënyrë vullnetare, pa asnjë shpërblim. Ka mbledhur artikuj nga gazetat e botës, dhe ka përkthyer vetë lajme të ndryshme për lexues potencialë të huaj.

Personalisht, kam mbetur shumë i impresionuar nga kjo sjellje tepër diskrete, larg çdo “protagonizmi”, e Alfred Kolës, i cili ka harxhuar energji e kohë nga të vetat në rrethanat që nuk njiheshim. Ne nuk u takuam asnjëherë. Dhe unë s’e mora vesh kurrë se ku jetonte, në atdhe apo jashtë. Më pyesnin dhe të tjerë se kush është Alfred Kola, dhe unë u thoja veç atë që dija. Dija vetëm që ai kish një pasion të madh civik, që ish i informuar mbi punët e kësaj bote, që kish një penë të mirë, dhe që lexonte e shkruante në disa gjuhë të huaja. I jam mirënjohës Alfredit, e më vjen keq që s’munda t’ia shpreh sa ishte gjallë.

Ne të stafit të respublica-s u dërgojmë ngushëllimet më të sinqerta familjarëve të Alfred Kolës. Dhe urojmë një paqe të përjetshme për vetë Alfredin.

Mustafa Nano