Çfarë kuptimi ka fotoja e Kryeministrit me papagall? Lubonja thotë se ai po tallet me një popull të varfër

Fotoja me papagall e Edi Ramës, postuar prej tij në “Facebook” vijon të komentohet, dhe edhe sot, Fatos Lubonja, ka dhënë një përshtypje që flet për faktin se kryeministri është ndoshta nga të paktët njerëz të lumtur në Shqipëri. Thotë Lubonja: “Sapo pashë këtë foto mu kujtua një tregim i Floberit, të cilin më është dashur t’ua komentoj disa nxënësve. Ka një libër ai, “Tri rrëfenja”, dhe është njëra prej tyre që titullohet: “Një zemër e thjeshtë” ose ndryshe “Një shpirt njeriu”. Ajo është historia e Felicitesë apo në shqip e Lumturisë. Feliciteja është një grua e thjeshtë, e cila ka shërbyer me shumë dashuri, ka dashur nipin, ka dashur një vajzë aty ku ka shërbyer. Është një njeri që jep dashuri pafund, por këta njerëz që do, i vdesin me radhë. Në fund fare, lidhjen e fundit që ajo pati, e kishte me nje papagall që quhej Luluja. Feliciteja, sa ishte gjallë papagalli, e donte si  fëmijën e vet sepse aty e projektoi dashurinë. Pastaj i vdiq papagalli dhe e ballsamosi. Dhe kur vdes Feliciteja, në vënd të pëllumbit i shfaqet papagalli si simboli i shpirtit të shenjtë, pasi dashuria për papagallin ishte shumë e madhe. Pra, këtë e thashë për të treguar se si e interpretoj papagallin. Ai kujtimi që më dha mua kjo foto, është ai kujtimi i nevojave që ka njeriu për të dashuruar, për të bërë mirë. Ne jemi popull i varfër dhe kemi nevojë që kryeministri të na dojë.  Mirëpo, tek ajo fotografia, ai duket shumë i kënaqur, nuk i mungon dashuria e njerëzve të tjerë dhe i kanë lënë papagallin. Ai duket i kënaqur se e do gjithë bota dhe papagallin e ka për t’u tallur. Ndërkohë që ne, një popull i varfër, kemi nevojë për një kryeministër që të na dojë. Të na japë një çikë më shumë dashuri, siç jepte ajo zemra e thjeshtë e Felicitesë. Ky është asosacioni që bëra unë“.  Përshtypje natyrisht që mund të marrin ndonjë përgjigje të radhës në “Facebook”.

s.z