Arkivat dhe botimet mbi Enver Hoxhën janë ende ndjellëse për shtypin e Tiranës

Prej vitesh, artikujt që prekin tema të viteve para '90-s, vecanërisht ato që venë në fokus jetën e ish-udhëheqësve komunistë, janë në top-listën e preferencave të kryeredaktorëve të shtypit të Tiranës. Kishte një periudhë që u duk sikur gazetat e mpakën këtë lloj informacioni, por këto ditët e fundit vihet re një valë e re dossierësh historikë.

Në garë këtë herë janë e përditshmja më e re DITA për të cilën raportohet një rritje e shpejtë në treg që në muajin e parë të botimit dhe e përditshmja më e shitur Panorama, e spikatur prej vitesh në këtë kategori botimi.
DITA ka arritur të nxjerrë nga arkivat dokumente te klasifikuara si sekrete, konkretisht ato që kanë të bëjnë me vdekjen e ish-kryeministrit Mehmet Shehu (për herë të parë nga këto publikime u mor vesh që Shehu është varrosur pa autopsi - një përjashtim thuajse unik për kohën) - dhe këto ditë kjo gazetë po boton dosjen e plotë arkivore të një prej proceseve gjyqësore më të bujshme të komunizmit, atë që dënoi me vdekje Kadri Hazbiun.

Kurse Panorama i është rikthyer temës së biseksualitetit të Enver Hoxhës, e prekur ca kohë më parë me rastin e botimit të "Enver Hoxhës" sipas Blendi Fevziut - duke botuar pjesë nga një vepër në frëngjisht e Thomas Schreiber “Enver Hoxha-sulltani i kuq”.

Si shpjegohet interesi për këto tema? Mungon një analizë mbi arsyet, por me gjasa ajo diktohet nga mosha e lexuesve të gazetave, të cilët në shumicë janë brezi që i ka përjetuar ato ngjarje në kushtet e një censure të fortë mbi informacionin publik. A.N.