Blushi: Shqipëria është e dobët e prandaj nuk jep asnjë garanci për një Shqipëri më të madhe

“Nacionalizmi lind nga forca, por në rastin e shqiptarëve po lind nga pakënaqësia; ose nga dobësia”, thotë Ben Blushi në një artikull për Panoramën, ku rreket t’i japë një përgjigje të strukturuar e racionale shpërthimit nacionalist të kryeministrit gjatë këtyre ditëve. Dhe në këtë shkrim ai dallon tre nacionalizma shqiptarë, që ekzistojnë në tre shtete të ndryshme, në Shqipëri, në Kosovë e në Maqedoni (“shtetet janë si ena; ato i japin nacionalizmit forma të ndryshme”, saktëson ai qysh në krye idenë e vet).

Dhe më poshtë shpjegon se ku konsiston ndryshimi. Nacionalizmi në Shqipëri është reagim, është pakënaqësi ndaj klasës politike, kërkon të rregullojë shtetin e vet, që ekziston prej 100 vjetësh, e nuk lind nga nevoja për të shtuar territoret. Nacionalizmi kosovar kërkon ta bëjë shtetin e vet. “Etja për shtet është cilësi që ne të Shqipërisë nuk e njohim, pasi shtetin e kemi pasur”, thotë autori. E Prandaj, në Kosovë nuk ka pakënaqësi ndaj klasës politike, por ka një pakënaqësi të qytetarëve e të politikanëve ndaj atyre që ua kufizojnë sovranitetin, dmth ndaj të huajve (Janë dakord kosovarët me këtë optikë, vallë?). Të tretët janë shqiptarët e Maqedonisë, të cilët në ndryshim nga shqiptarët që janë të pakënaqur me shtetin e tyre 100 vjeçar e në ndryshim nga kosovarët që duan ta ndërtojnë shtetin e tyre sovran, duan ta prishin shtetin që kanë, atë maqedonas, e ky fakt përkufizon nacionalizmin e tyre.

Blushi e sheh bashkimin të pamundur hë për hë, pasi Shqipëria është e dobët dhe me probleme rrjedhimisht nuk jep asnjë garanci për një Shqipëri më të madhe. Përveç kësaj, Blushi sheh në idenë e bashkimit imediat dhe një kontrast mes madhësisë (apo madhështisë) dhe demokracisë.

Shkrimin mund të lexoni të plotë në versionin print të së përditshmes Panorama, dhe në orët e pasdites në versionin online të së njëjtës gazetë.

Re.Pu.