Shoqëria e titraxhinjve

Koloreto Cukali

Nuk kisha në plan të shkruaja për Vaçen, se nuk kisha gjë për të thënë. Mbingopjes televizive me emisione të gjata e diskutime pa fund, me fjalime patetike e me nostalgjira të dyshimta mund t’i ikësh thjesht, me një buton telekomande. Por, një titull mbi një shkrim të znj. Gaçe ku sulmonte publicistin Lubonja më detyroi të kthehem të lexoj edhe shkrimin e këtij të fundit. Shqetësimi i parë: debilizimi masiv.

Debilizimi masiv

Shqetësimi ka lidhje me titullin e shkrimit të Lubonjës, që në fakt nuk na paskësh qenë titull. Isht një “sintezë” e nxjerrë nga portalet, lajmet e titruara në TV apo përmbledhjet në gazeta të tjera: “Debilizmi masiv”. Që në titull, më saktë, që në titër, ky term është revoltues. Aq më tepër kur shkrimin e Lubonjës ta përmbledhin thjesht: Lubonja e quan debilizim masiv reagimin e shqiptarëve për Vaçen. U futa të lexoj, dhe m’u desh t’i rikthehem shkrimit për të gjetur frazën fatale: “debilizim masiv”. Kjo frazë nuk ishte as esenca e shkrimit e as elementi kryesor që donte Lubonja të nxirrte. Por, shoqëria shqiptare dhe ata që u ulën për ta lexuar shkrimin e për të shkruar kundrapërgjigje të rrufeshme u ngacmuan pikërisht nga kjo frazë. Këtu vjen në pyetje shqetësimi tjetër, shoqëria e titraxhinjve.

Shoqëria e titraxhinjve

Ne nuk lexojmë shkrime, ne lexojmë titra, thotë një mik gazetar. Njoh shumë njerëz që përmbajtjen e gazetave e përkthejnë thjesht mes leximit të titujve. Kjo ka bërë që dhe vetë media, sidomos ajo e shkruar, të fokusohet tek nxjerrja e titujve stimulues. Këta tituj merren nga TV-të e blogjet, nga statuset në rrjete sociale, nga strishat që dalin poshtë kanaleve muzikore e jo vetëm, dhe formojnë një tërësi që mund ta quajmë “shoqëri titraxhinjsh”, një komb i tërë që lexon vetëm titujt a titrat, dhe kaq i mjafton të bëhet pasionant, të zërë një barrikadë e të lëshojë helme që andej. Në këtë rrjetë pasioni besoj se është kapur dhe znj. Gaçe kur u ul e shkroi atë artikull, ku, pavarësisht se këngëtare, mëton të bëjë psikologen duke u marrë me njeriun që ka shkruar një shkrim që përfaqësohet me titrën acaruese “debilizim masiv”.

Debilizimi i debilizimit masiv

Nuk do kisha dëshirë të merresha me artikullin në vetevete, sepse është e vështirë të kapësh argument me një shkrim ku ka fjali të tilla: “Merre një herë foton e Hitlerit e vendose pranë vetes, dil në pasqyrë dhe mundohu të gjesh ndryshimet. Merr edhe foton e Vaçes e të kujtdo artisti e bëj të njëjtën analizë... shiko, brenda syve të artistëve ka shumë, po shumë dashuri (ndjenjë që ti nuk e njeh) .... merr e shiko sytë e tu... janë të mbushur me urrejtje e ftohtësi...” ose, ku ka sinteza ontologjike si kjo: “Dëgjo, ti misionin tënd mbi tokë e kreve si i dërguar i djallit, na helmove sa herë munde”.

E vetmja gjë që mund të mendoj, është që znj. Gaçe, si pjesë e një shoqërie titraxhinjsh, e ka keqkuptuar funksionin e debatit mediatik, sikur është sherr me individin. Dhe nuk ka faj. Po të lexosh titujt/titrat e kësaj shoqërie ajo që të krijohet është bindja që media vetëm për këtë na duhet, t’i biem filanit a fistëkut, se e bëri borxh. Por, problem më i madh se keqpërdorimi i fjalës në emër të pasionit (negativ) është pamundësia për të reflektuar. Dhe nuk e kam për znj. Gaçe. E kam për shoqërinë e titraxhinjve.

Refleksion mes titrash

Për të reflektuar mbi një fenomen, ka nevojë të vihet gishti mbi plagë. Mbi të gjitha, ka nevojë që pasioni të reduktohet në minimum për të lënë mendjen të funksionojë. Ajo që unë lexoj te shkrimi i Lubonjës (dhe këtë nuk mund ta gjeni në titra, ose, kur vini ta lexoni shkrimin të acaruar nga titrat) nuk ka të bëjë me Vaçen sesa me rolin e artistit në kohën e Enverit dhe një rivlerësim i historisë (të muzikës, në këtë rast) me një qasje njerëzore e jo teknike. Pra, nëse doni të flasim për Vaçen teknikisht si një zë i madh, është një gjë. Mund të flasim për këtë e t’i thurim plot lavde, dhe këtu znj. Gaçe ka të drejtë. Nëse duam të flasim për artisten që i shërbeu vijës së Partisë, atëherë kjo nuk ka të bëjë me Vaçen si individ, por me rolin e artistit në sistem. Në këtë rast, Lubonja ka të drejtë.

Por, para se të vijmë te roli i artistit/Vaçes, më duhet të them që ne si shoqëri nuk jemi shoqëri reflektuese. Ne ndizemi në mënyrë pasionale mes titrash. Ne nuk e njohim, nuk e duam dhe na acaron refleksioni. Refleksioni ndodh mbi idetë, por ne kemi merak të merremi me individin. Mbase ka të bëjë me motin, mbase me pozicionin gjeografik, mbase ka të bëjë me nivelin e proteinave, por kjo është çështje tjetër.

Frika ime, është që ne si shoqëri nuk do të mund të reflektojmë kurrë. Na bie më kollaj të fajësojmë motin. Ndaj reagimi ndaj një provokimi për reflektim, na bën të acarohemi sa të krahasojmë Lubonjën me Hitlerin (ha-ha). Por le të kthehemi te Vaçja. Më saktë, te Vaçet.

Vaçet e Enverit

Dikush ka thënë një frazë me vlerë: Në diktaturën e Enverit nuk ka pasur kurrfarë disidence. Sepse, disidenca që të ekzistojë, ka nevojë që të lejohet të marrë frymë. Dhe ai sistem thjesht nuk e lejonte disidencën të jetonte, të merrte frymë. Të jesh në burg nuk të bën disident, të bën thjesht një njeri që ka folur “kundër”. Por disidenca e mirëfilltë nënkupton një veprimtari aktive kundër një regjimi përmes shkrimit, propagandimit, organizimit a veprimtarive “kundër”. Në atë kohë kishte vetëm një rrugë, “i partisë” ose “i izoluar”. Vaçja, siç mund të vetëkuptohet, kishte zgjedhur të ishte “e partisë”. Nuk ka bërë ndonjë krim, këtë e bënin të gjithë. Por, debilizimi masiv përfshin edhe përpjekjen për ta nxjerrë Vaçen (e këdo që do vijë më pas) si një individ që ai sistem i “preu krahët”, nuk e la të “shpaloste talentin”, të këndonte “I will always love you” (që ne e morëm vesh që ekzistonte si këngë vetëm në vitet ’90) apo të afirmohej në eurovizione. Duke ndjekur debatet patetike të debilizimit masiv, për një moment m’u duk sikur Vaçja na ishte viktima më e madhe e atij sistemi, heroina më e pakuptuar dhe e sabotuar. Në fakt, nuk është kështu. Vaçja ishte një artiste konformiste me një zë të madh. Kaq. Por, kjo mund t’i japë një piedestal në TOB, por jo në panteonin e artit shqiptar.

Vijmë te heronjtë/heroinat.

Mbi heroinën

Ne kemi nevojë të ngrejmë mite në art. E kemi panteonin bosh. Ndaj, e kuptoj nevojën e njerëzve të trajtojnë dikë si hero, heroinë në këtë rast, Vaçen. Popujt e civilizuar kanë heronj dhe jo vetëm në histori, por në art, kulturë, shoqëri. Një nga krimet më të mëdha të kohës së Enverit ishte që sheshoi me kazma e lopata çdo mundësi për të pasur të tillë idhuj. Mbi gërmadha u ngritën heronj të rremë.

Kadareja akoma është një idhull që lëkundet. Një mit pa një bazament të fortë, sepse, ai u ngul në baltën e socializmit. (Ku t’i kërkoj rrënjët e tua, Parti?). Talente të mëdhenj si Vaçja a Kadareja janë viktima të sistemit që i promovoi e i përdori, për të realizuar pushtetin e vet. Por, ata janë buste që lëkunden. Por, një shoqëri e civilizuar ka nevojë për mite. Edith Piaff, Marilyn Monroe, James Dean, janë mite edhe ndërkombëtarë me të metat e tyre.

A mud të ishte Vaçja një e tillë? Mbase. Kjo është pjesë e refleksionit. Nëse njerëz si znj. Gaçe janë në gjendje të përballojnë kriteret që duhen për të bërë një refleksion. Dhe fjali si kjo: “Pakënaqësia jote, inati yt, ato çfarë t'i shkruan e nxjerr nga goja, më tregojnë se je i pashpirt. Më kujton një ish-oficer të ushtrisë hitleriane, që kishte shfarosur qindra njerëz, e ai me ftohtësinë më të madhe, thoshte se kishte bërë detyrën. Do thuash ti, po s'është njësoj…” nuk besoj se përbëjnë refleksion. Më tepër ndezin pasione të tjera, si reagimi i vëllait të së ndjerës Zela, të cilin nuk e citoj dot se e pashë vetëm në titra.

Rikthim te titrat

Një dekonstruktim të mitit të Gramoz Pashkos si një nga ekonomistët që ideuan katrahurën ekonomike që jetojmë ne sot, kish bërë dhe Mentor Kikia. Por, për fat të keq, lajmi nuk zuri hapësirë titrimi të mjaftueshme sa të nxiste pasione të tërbuara në media. Dështoi pra, të krijojë një debat me shumë vlerë: Teoritë ekonomike të fillimit të viteve ’90, të aplikuara në Shqipërinë post-enveriste çfarë shkaktuan?

Problemi im personal që kam me shoqërinë e titrave, është që ka kohë që me shumë vështirësi gjej dot ushqim për mendjen në median shqiptare. Kjo, po më bën gradualisht të mjaftohem vetëm me titrat. Edhe për shkrimin e znj. Gaçe, mjaftonte të lexoje titrat për të kuptuar përmbajtjen. Përveçse nëse e urren aq shumë Lubonjën sa të ushqehesh emocionalisht me një shkrim ku dikush i tregon se si duhet të vrasë veten.

Mbi burgun

Nëse do duhej të dilte një titër pa lidhje me shkrimin, do doja të ishte kjo: “Boll përmendët burgun e Lubonjës, e boll psikologjisët nëse ka dalë apo jo nga burgu emocionalisht. Boll treguat me gisht individin dhe problemet që ne na duket se ka. Ne vetë jetojmë në një burg pervers. Unë, ju dhe zonja Gaçe”.

Revista Klan nr.858

Comments

Sh sakte Koloreto. Bravo!

Sh sakte Koloreto. Bravo!

migena po aq e madhe sa dhe

migena po aq e madhe sa dhe koloreto je dhe ti!!unë e lexova,por nuk kuptova shumë!mund të ma shpjegosh sado pak saktësinë e koloretos??këtë replikën time merre si të duash,si injorancë a provokim,por ma jep një shpjegim të lutem!jo vetëm për atë punën titrave por dhe çmitizimit të vaçes,propagandueses së vijës së partisë dhe merlin monros ngritjes së moralit të trupave amerikane në kore!!do më bëje një nder të madh!do bëja një hap përpara drejt kulturës,duke lënë pas injorancën!!

Migena, sakte ky shkrim per

Migena, sakte ky shkrim per menyren se si e lexoj une, ka vetem paragrafin "Shoqëria e titraxhinjve". Pjesa tjeter eshte nje kaos mendimesh qe nisim mire e mbarojne rremuje, ose nisin gabim dhe rregullohen ca rruges.Per pjesen e Vaces jam 100% i sigurt qeCukali  ja ka fut kot.  Kam folur me rreth 10 vete qe e kane njohur Vacen nga shume-shume afer, dhe te gjithe bashkohen ne te njejtin mendim qe regjimi asaj nuk ja preu krahet se Vacja i duhej (Vacja ne biseda mes artistesh i "jepte gjuhes" shume me teper sec e lejonte koha), por ja lidhi krahet sic ja lidhin pellumbave qe te mos fluturojne.  Regjimi i hoqi mundesine te behej nje dive boterore, e detyroi qe te behej konformiste, per te shijuar ca liri me shume se te tjeret.  Cfare donte zoti Cukali qe ti bente me shume ?Nuk mund te beje pjese Vacja ne Panteonin e artit shqiptar  ???!!!  Gomarllek me te madh nuk me kishin degjuar veshet.  Me 2040, 50 vjet pas shembjes se komunizmit, ato pak vepra arti te gjysem-shekullit komunist qe do respektohen dhe do kujtohen akoma me kenaqesi do te dominohen nga librat e Kadarese dhe kenget e Vaces.   Z. Cukali me kete shkrim sjell prova te reja qe eshte nje njohes i dobet i historise dhe i artit, por si komentator titujsh dhe titrash do vlera i ka.

Te gjitha po ti bej hallall

Te gjitha po ti bej hallall or Anti-indiferent, por kur me thua qe regjimi e pengoi Vacen te behej dive boterore, nuk mund te ri pa te pyetur ishe esell, apo......?

Gazetarët dhe shoqëria e

Gazetarët dhe shoqëria e ndajnë bashkërisht fajin e "shoqërisë së titrave", në masën që spaçatori i drogës ndan përgjegjësinë me përdoruesin për drogën në qarkullim. Lind pyetje, e  kujt është përgjegjësia më e madhe? Në shkrimin e mësipërm duket sikur përgjegjësia për titrat sensacionale dhe për humbjen e realitetit bie mbi shoqërinë, e cila kështu i dashka. Natyrisht që pasi gazetarët shqiptarë, përfshi këtu edhe vetë Cukalin, kanë vite që edukojnë lexuesin shqiptar me mesazhe të titruara, është vështirë të presësh publik të përgjegjshëm. Edhe pse Cukali vë gishtin në plagë, medat për të cilat ai punon janë vetë promotorë të kësaj politike lajmi, sepse ashtu tërheqin më shumë lexues, shesin më shumë gazeta, por edhe i shërbejnë më mirë një krahu politik kundër tjetrit, ose të dy palëve kundër të gjithëve. Sidomos gjatë muajve të fundit, Respublica është bërë vetë forum lajmesh në formë titrash, ose duke i prodhur ato vetë, ose duke i marrë hua nga dacibao si TEMA, DITA etj. Prandaj, Koloreto Cukali, kur shkruan mbi problemin e titrave, është mirë të përqëndrohesh tek "gazetarët titraxhinj", dhe të kritikosh së pari atë taraf ku bën pjesë vetë dhe atë fenomen që të jep bukën e përditshme.

shtjellim i shkelqyer. gjerat

shtjellim i shkelqyer. gjerat jane analizuar thuajse ne menyre shkencore. por...ka gjithmone nje por...problemi i vertete eshte se ne nuk reflektojme. nuk ka per te pasur te drejte Lubonja, perderisa ajo qe ka ndodhur ne vendin e shqiponjave ka qene nje ferr, ku te gjithe ishin te lumtur, madje edhe viktimat mundoheshin ta bindnin veten se ishin te lumtura, si pjese e domosdoshme e nje skenariku luhej komedia e lumturise se pergjithshme.viktimat ishin solidare me fatin e tyre dhe me pjesen tjeter te popullsise, e cila meqenese e njeh kohen e diktatures si pjese te jetes se vet, nuk mund ta pranoje se ka qene fatkeqe. thjesht sepse kishte edhe me keq. dhe sepse te mos qenit i persekutuar duket sot si lumturia vete, sidomos kur meson hollesira mbi ate qe kane kaluar te persekutuarit.reflektimi duhet te vije nga masa. reflektimi mund te vije edhe nga disa koka, por kjo s'mjafton. vec kesaj kjo koha qe jetojme nuk se eshte e shkelqyer. mbase ne kemi nevoje ta rimendojme cdo gje nga e para.

"Vaçja ishte një artiste

"Vaçja ishte një artiste konformiste me një zë të madh. Kaq. Por, kjo mund t’i japë një piedestal në TOB, por jo në panteonin e artit shqiptar."Cfare tjeter duhet te beje nje kengetar (apo artist ne pergjithesi) pervec se te kete ze te mire e te kendoje bukur per tu futur ne Panteonin kaq ekzigjent te artit shqiptar? Te ece mbi uje apo te martirizohet per te shpetuar popullin? Kasem Trebeshina ishte nje krijues qe ishte njekohesisht disident (nga te paktet disidente qe ka patur Shqiperia). Une atij burri i heq kapelen per kurajon - por nga pikpamja letrare ai nuk pati kurre mundesi te zhvillonte talentin. Krijuesit e medhenj qe ishin disidente kane qene te paket ne tere lindjen. Sa probabilitet ka qe disa prej tyre te na binin per pjese ne shqiptareve qe ishim 2 milion ne ato vite?Perbaltosja e krijuesve tane te shkrete, te vegjel por dinjitoze nuk do te lejoje kurre te ngrihet asnjehere ndonje monument per vlerat tona modeste. Per sa kohe qe orthodoxia e nihilisteve tane nuk le dy gure bashke per ti perkujtuar, ne do te vazhdojme te merremi me mitet artistike "shqiptare" te Alexander Moisiut dhe Jan Kukuzelit. Sepse vec ata nuk jetuan ne nje epoke kur perkrahesit me te forte te Enverit ne gjallje te tij (shume prej te cileve derdhen kokrren e lotit kur vdiq ai) gjykojne me puritanizem ca persona me pak talent dhe shume vullnet, qe dashurine per artin e kishin me te forte se urrejtjen per diktaturen. Kritika eshte e lehte- arti eshte i veshtire. Vacja vdiq dhe la pas mirenjohjen e atyre te cileve ajo u dha nje dite te bardhe kur populli ishte duke ngordhur nga uria. Po gjenerata jone e kritkeve me fytyre te vrerosur, cfare do te lere pas?

"Kritiket e fytyres se

"Kritiket e fytyres se vrerosur" do te lene prapa vetedijen kolektive qe jemi nje shoqeri mooti, dhe prej andej nuk dilet duke ekzaltuar nje te kaluar te rreme, as duke ngritur ne piedestal figura qe nuk qendrojne dot vete ne kembe. Vetedija e mjerimit ne te cilen gjendet nje shoqeri eshte premise e domosdoshme per te dale nga ky mjerim, dhe prej andej nuk dilet duke brohoritur "o sa mire me qene shqiptar", por duke kritikuar dhe luftuar mekatet e krimet qe turperojne statusin e te qenit shqiptar. Nuk i kemi kritikuar e perçmuar sa duhet aspekte te caktuara as te kaluares, as te tashmes tone, prandaj gjendja ne te cilen jemi sot nuk mund te quhet rastesi.

"Figura qe nuk qendrojne dot

<div>"Figura qe nuk qendrojne dot vete ne kembe" - a po flasim per Vace Zelen? Jam shume dakord per domosdoshmerine e vetedijes se mjerimit si parakusht per te dale nga mjerimi. Por ne rastin konkret tema e bisedes eshte mbi vlerat e pakta qe kemi trasheguar dhe argumenti im eshte se ata nuk ishin shkaktare te mjerimit, por viktima si te tjeret. Une nuk kam deshire as te mbroj e as te denoj ekzaltimet nacionaliste te cilave u referoheni ju. Mbase ata kane aresyet e tyre, une nuk i hyra hic atij muhabeti. </div><div>Por cfare kuptoni ju me "mekatet e krimet qe turperojne statusin e te qenit shqiptar"? Qe nje grua kishte ca talent dhe zuri te kendonte? Po atyre dhjetera futbollisteve qe luanin me ekipet e Ministrise se Brendeshme qe benin te mbusheshin cdo te diele shkallet e stadiumit me njerez qe donin te harronin hallet, si do ti quani, kriminele?  Kjo nuk ka kuptim.</div><div>Detyra e nje artisti (apo shkrimtari apo sportisti) nuk eshte te jene domosdoshmerisht ne vijen e pare te luftes per demokraci e te drejta njeriu. Shumica e tyre as nuk kane fare trajnim, as njohuri te mjaftushme e as moshe per ate pune. Detyra e atyre qe merren me profesione krijuese apo me sporte eshte te bejne njerezit te enderrojne dhe tu zbardhin diten.</div><div>Une nuk jam naiv dhe e kuptoj se cfare presioni kishte tere populli qe t'i rrinte regjimit me dore ne zemer dhe te ruante koken e vet dhe jeten e femijeve; nuk i ve faj shume as atij punetorit a fshatarit qe nen lavazhin e trurit qanin me kokerr te lotit kur vdiq E. Hoxha. Por mua me duket hipokrizi qe ne nje popull ku te gjithe coheshin si kllockat te votonin qe ne ora 6 te mengjesit, qe i deklaronin 7 dite ne 7 besnikerine Partise, ku masivisht komshija spiunonte komshine, te gjejme simbolet e perversiteteve tona kombetare te se kaluares tek ata njerez qe jo vetem nuk ishin fare me te keqij se te tjeret por qe benin te mundur te kishte pak minuta muzike midis dy emisioneve te lajmeve. </div><div>Vacja, Panajot Pano, Gaqo Cako dhe shume te tjere, ishin njerez qe njelloj si ju te tjeret ruanin veten se u hante sigurimi koken por qe kishin aq talent (mbase jo kushedi, por mjaftueshem ne nje vend steril si Shqiperia) qe tu jepnin njerezve nje cerek gezimi. Aresyeja qe ndonje prej tyre kritikohet fort, nuk eshte se ne te pamekatet e tjere kemi te drejte te hedhim gurin e pare, por se keto figura dalin mbi anonimitetin qe shumica e shoqerise tone mekatare gjen ne mediokritetin e vet.</div>

Është lehtësisht i kuptueshme

Është lehtësisht i kuptueshme nga vjen gjithë kjo indinjatë kolektive ndaj Lubonjes dhe kritikes së tij : kombet e nacionalizmat kërkojnë mite, rrëfenja për të qëndruar në këmbë. Dakort që këto mite e rrëfenja kanë funksionin e tyre në kohezionin e një shoqërie, identitetin dhe sensin e të qenit bashkë. Po përtej kësaj për çfarë fajësohet Lubonja? Ai dhunshëm ka prekur atje ku nuk lejohet të preket, ka thyer një arkemort prej të cilit nuk pritet asgjë përpos një duhme të keqe. Por ata që kanë lexuar me vëmendje shkrimin, ose nuk kuptojnë, ose s'duan të kuptojnë që ky nuk ka qenë qëllimi primar i shkrimit. Pjesa thelbësore e tij është letra e Enverit dërguar Ramës, ku denoncohet vazhdimësia e sistemit të djeshëm në korrupsionin dhe krimin e sistemit të sotshëm. Ai ka goditur shtyllën kurrizore të sistemit që ka nënshtruar e vazhdon të nenshtroje shqiptarët, dhe pa dashje apo me paramendim ka këputur një nerv që u dhemb të gjithëve. Po përse nuk diskutohet për thelbin e shkrimit por për efektin e tij anësor? Sepse elitës së korruptuar me gjithë tellallet e saj kjo u intereson më së miri, zhvendosja e debatit mbi legjitimitetin e vetë sistemit në një muhabet korr e mos lidh të tipit "ka vlerë apo ska vlerë Vace Zela". Elita e korruptuar e Tiranës nuk është as nacionaliste, as patriotike, as qytetare, atyre u interesojnë mitet e rrëfenjat për sunduar e nënshtruar siç kanë bere deri më tash, ndërsa ju që rendni pas retorikës së tyre ndërkohë që Damir Fazllicet gllabërojnë koncesionet strategjike dhe Shqipëria plaçkitet nga pasuritë e fundit që kanë mbetur. Mblidhini të gjitha copat dhe shifeni cila tablo është më reale për gjendjen e Atdheut që kaq shumë idealizoni : Shqipëria e Vace Zeles dhe realizimeve 120% mbi planin, apo tabloja e Lubonjes mbi sundimin e përjetshëm të një pakice që i shet mite shumices si arsye për të duruar nënshtrimin...

Me fal mor zoti Pepkola, por

Me fal mor zoti Pepkola, por ti nga menyra se si shkruan dukesh qe nuk e ke jetuar ate kohe e ate rregjim, per pasoje gjerat i njeh me te degjuar. Une vetem nje gje po te pyes ty, pasi po e pranoj qe Vace Zela, Gaqo Cako, e ku di une kush tjeter nuk ishin me te keqij se te tjeret, por a mund te me shpiegosh ti pak pse na paskan qene kaq me te mire se te tjeret sa mileti te shkule lesht e kokes kur vdesin, edhe pse kane me se njezet vjet qe nuk u eshte ndjere zeri as per mire e as per keq?Po ashtu, ajo qe benin ata nuk eshte se u jepte te tjereve cerek gezimi si thua ti, ishte nje menyre per te harruar gjemen ku i kishte hedhur historia. Nese ti e quan qofte edhe cerek gezimi, perpjekjen per te harruar (e kupton ti , ca ia mbysin me raki per te harruar, por kur iu del rakia e shohin qe jane po aty) atehere nuk ke kuptuar kurgje nga ajo kohe. Dhe ashtu eshte sic thua ti, ai popull kishte sa te duash spiune, edhe trushpelare, po mos harro qe kishte edhe te spiunuar, kishte edhe njerez qe e kuptonin fare mire se si luhej loja, por nuk kishin mundesi te benin shume. Nejse, lum si ti qe per ate kohe vetem ke mundesi te japesh mend, dhe nuk ke lene ndonje cope mish gjekundi.

Koloreto shkruan: "...Ne

Koloreto shkruan:"...Ne kemi nevojë të ngrejmë mite në art. E kemi panteonin bosh. Ndaj, e kuptoj nevojën e njerëzve të trajtojnë dikë si hero, heroinë në këtë rast, Vaçen. Popujt e civilizuar kanë heronj dhe jo vetëm në histori, por në art, kulturë, shoqëri. Një nga krimet më të mëdha të kohës së Enverit ishte që sheshoi me kazma e lopata çdo mundësi për të pasur të tillë idhuj. Mbi gërmadha u ngritën heronj të rremë.Kadareja akoma është një idhull që lëkundet. Një mit pa një bazament të fortë, sepse, ai u ngul në baltën e socializmit. (Ku t’i kërkoj rrënjët e tua, Parti?). Talente të mëdhenj si Vaçja a Kadareja janë viktima të sistemit që i promovoi e i përdori, për të realizuar pushtetin e vet. Por, ata janë buste që lëkunden..."Urime Koloreto,Merret vesh, ka shume te vertete brenda ketyre radheve, qe ishin vendosur midis ca radheve te tjera, qe "per shkak te titrave", edhe te Koloretos!, ngrejne dyshime, pikepyetje...Pak rreshta me siper ketyre te cituarave, Koloreto citon, pa emer, pikerisht Kadarene, qe : "Ne Shqiperi nuk ka pasur disidience. Se disidenca nuk lejohej qe te shfaqej".Kjo eshte farsa, ky eshte miti, Miti i Fjales Shfajesuese te Kadarese: Meqe une nuk munda te beja disidentin, s'ka te tjere!Natyrisht qe eshte loje fjalesh: natyrisht eshte mashtrim ia ndershem: Sepse, ne Shqiperi ka pasur burgje, apo jo Kadare?Apo jo, Koloreto?![fragment shkeputur nga nje liber ne proces]

ne fakt kujtoja se titullin e

ne fakt kujtoja se titullin e artikullit e zgjedh autori,ose te pakten jep konsensus per zgjedhjen e titullit.Por nejse!Ka gjera qe nje individ nuk i suporton dot kollaj,edhe une i kam zet funeralet.Kam edhe ahengjet,dasmat me valle e me para ne dore,mos pyet per mitingjet,dikur ku kam qene ndonjehere rrija ne nje kend te larget.Ka tipa indiferente ne aparence,ose i shqeteson turma,tifozlleku.Kur isha i vogel e shkoja ne stadium e kishim me arbitrin,pa ditur as rregullat e futbollit.Kur shkelmat i jepte mbrojtesi yne na dukej e rregullt,kur shtynte kundershtari donim penallti edhe ne mesin e fushes.Por nuk kam share kurre nje arbiter.Kam pershtypjen se Lubonja eshte nje individ i tille dhe s'ka asnje gje te keqe.Dihet qe funeralet keshtu jane,flasin mire ata qe asistojne.ky eshte rregulli ne tere boten.Debilizimi eshte nje forme kolektive e konformizmit;ben ashtu se duhet bere per syte e botes.Por Lubonja e tepron,ose nuk zgjedh nje moment tjeter te hedhe teorine e tij te debilizimit.Se pari,Vaçja eshte"rizbuluar"kete dekaden e fundit.Mjaft shqiptare,sidomos ata jashte kane mallengjim dhe nuk pelqejne vetem zerin e Vaçes,edhe muziken,edhe tekstin.Natyrisht disa kenge jane,por edhe Deep Purple ndonje kenge ka te madhe.Edhe ndonje autor ndonje roman ka gjigand,edhe Verdi nuk eshte se i qellonte te tera operat.Mbaj mend ne nje konkurs historie,kur kishim te drejten e nje pyetjeje te lire dhe une kerkova nga skuadra kundershtare se kujt aktori shqiptar i ishte dhene unaza e Iflandit.Nuk e gjeten,por sepse nuk e kishin lexuar,se mjafton te hapje librin per Aleksander Moisi dhe ishte aty.Solla kete shembull per te thene se Lubonja ka lexuar mjaft,por s'e kuptoj pse Vaçja"paskesh zgjedhur"komunizmin(kete e thote edhe KC ketu);mos valle kishte ndonje alternative tjeter?Apo Kadare?Edhe une kam menduar se Kadareja ishte tradhtari i madh,ai na i solli tere te keqijat,po te mos bente vargjet ai shqiponjat s'do fluturonin lart,Partia do kishte mbetur pa rrenje.Trasta e Driteroit me balte do kish mbetur jashte Lidhjes se shkrimtareve,etj.Po te mos ishin keta do kishte plot te tjere,do kishim nje letersi me monotone,pa Vaçen do kishim festivale me monotone,pastaj njefare arritjeje do pranuar,sepse kulture ishin edhe kendet e kuqe neper fshatra,kulture ishin bilbliotekatato rrethet letrare te dikurshme,shkembeheshin eksperiencat.E kuptoj qe tarafet ekzistonin,por edhe ndonje arritje pati.Lubonja i fshin me gome;nuk i shkon Lubonjes ky nihilizem,sepse ai eshte i ditur.Nje i ditur mund te jete kritik,por jo nihil.Kurse per ikonat boterore,po them psh.James Dean,per filmin"Rini e Djegur".Ikone mbeti sepse vdiq i ri.Piaf,sepse francezet jane shume nacionaliste e konservues,ata e quajne edhe sot"Madame France".Monroe sepse vdiq e re,pastaj ishte ikone bukurie,bota eshte sensibile per keto gjera.Per titujt mendoj se eshte nje çeshtje marketingu.Besoj se KC e di kete,gazetat per fat te keq jane edhe mall tregu,kane shume vlera te tjera,por kane nje fature.Zgjidhen kudo tituj bombastike,here-here vetem titulli vlen gjysmen e artikullit.Pse behen?Po pra,per te rritur numrin e shitjeve;ka ndonje logjike tjeter?

Mire o Koloreto, mire, se

Mire o Koloreto, mire, se edhe ti po per dekonstruktim na qenke, njesoj si lubonja... Nuk e kuptoj kete qejf te madh te ketyre opinionisteve, qe per shkak te interesave profesionale, i mbajne ison njeri tjetrit..... asnje nuk ka nje mendim te vetin profesional, per ate qe i perket "grupit" te vet..... ja shiko... Koloja, Muçi, Stefani, edhe dikush tjeter, qe te gjithe e mbrojne Lubonjen... e po te shikosh keto blogjet e interrnetit, pakkush e mbron... A thua qe keta qe e mbrojne Lubonjen me artifica vari trapin, te jene me te mençur, se keta te debilizmit masiv qe e shajne...??? A mos valle keta fare opinionistesh, ka ardhur koha qe te rishiikojne qendrimet dhe idete e tyre, qe te mos jene kontravers me popullin, por ti paraprijne atij...E ku e ka te keqen, Vaçja, qe fati e desh, ashtu si gjithe brezi yne, te lindte ne kete periudhe dhe artin e saj ta shtrinte ne po kete periudhe, nga shume te paemer, para saj dhe epokes se saj...??? Perse ne duhet te vjellim vrer, per figurat tona te periudhes 50 vjeçare te komunizmit, kur ne vetem ne ate periudhe mund te mburrremi mme shkencen artin e shume e shume fusha te tjera, ja ashtu me te mirat dhe te keqijat e veta...??? Perse ne sot duhet ta ngreme ne qiell bashkepunetorin e fashizmit, dhe kriminelin qe vrau Bardhok Biben, Marta e Prena Tarazhin,  Mark Gjonin Marku, siç ben i ashtuquajturi historuan Gjet Ndoi, vetem e vetem se ai na paskesh qene vallaha antikomunist...?? Nuk e di po te ngresh kaq larte figura kaq te diskretituara qe ishin kolaboracioniste dhe perkrahes te fashizmit dhe te perbaltesh ata qe perkrahen popujtt ne lufte kunder fashizmit... nuk e di se ç'emer ti ve... ja po keto ndodhin edhe me Kolon e te tjere, te cilet jane gati qe te perkrahin edhe djallin, thjeshte vetem e vetem tua ulin vlerat atyre qe i paten ato me kulmet e tyre, por thjesht se fati beri qe u linden dhe u rriten ne periudhen e komunizmit.... fati i tyre i keq, qe perballet vetem duke e vene tere brezin mbi turren e druve antiikomuniste...

Mos valle ka ardhur koha te

Mos valle ka ardhur koha te kuptosh qe gjithmone nje 10% e shoqerise eshte me inteligjente dhe me elitare dhe njerezit e thjeshte (pjese e mases si ty) duhet te pranojne ate qe ato thone (nese nuk e kane kapacitetin per te kuptuar), ashtu si femija qe edukohet kur nuk ka akoma mend per te vendos vete.

alidemso "Perse ne duhet te

alidemso"Perse ne duhet te vjellim vrer, per figurat tona te periudhes 50 vjeçare te komunizmit,"është pjesë e historisë tonë!duam sduam kemi lindur në atë kohë kemi jetuar në atë kohë,kemi luftuar kundër asaj kohe kemi punuar për atë kohë,kemi qënë indiferent në atë kohë!kudo që të kemi bërë pjesë në atë kohë,nuk mund të çbëhemi!!sot ndryshe nga gjithë bota ne duam ta fshijmë,ta mohojmë egzistencën tonë në atë kohë!!njëlloj sikur të themi se meqë dora/këmba/syri a gjysma e trupit nuk ka qënë në rregull(me standartet e sotme)unë do ta pres,zhduk ,eleminoj!përfundimi do të ishte një trup i mangët!një njeri invalid!sot lubonja e turrli pseudo opinionisti kërkojnë mohimin e një pjese të historisë tonë!kërkojnë të mohojnë të mirat(sado pak të ken qënë)dhe ju pompojnë të këqijave!sikur vetëm shqipua paska vuajtur nën diktaturë!sikur vetëm shqipua ka qënë i shtypur ë këtë botë!!të tjerët maksimumin e paskan pasur 1000 herë më pak se ne!!sikur "shqipua" fatos e sali berishë,i paskan provuar tërë sistemet diktatoriale në botë(gjat gjithë historisë,në kuriz të tyre direkt)dhe paskan aritur në përfundimin se ky shqiptari paska qënë më i tmerrshmi!mohimi i një hallke të zinxhirit të historisë të bën të mos kesh më një zinxhir,por dy copa zinxhiri!!këtë përpiqen të bëjnë këta dallkaukër!!më pas vijnë mbartësit e mentalitetit shqipo-fshataresk,muç,mero,kol cukali që thonë këtë maskarain unë e kam shok dhe për pasojë shoku tim nuk është i keq!për psaojë unë do ta mbroj shokun tim!pavarsisht se unë e di se ai është për të mos u prekur as me shkop!dhe kur e mbrojnë këtë "shok e mik"?vetëm në rastet që ai prek të përgjithshmen,prek atë që nuk i prek ata direkt!!kur i prek direkt e bëjnë cop dhe kockën ja hanë!!kështu dhe kol cukali ë këtë rast!mundësinë e ka kohën e ka arsyetime gjen sa të dojë,pavarsisht se bën një çorbë derri si ky i rradhës!!alidemso,ne shkatërruam mohuam/glorifikuam periudhën zogiste!shaktërruam/glorifikuam periudhën komuniste e kështu deri sot!asnjë herë nuk kemi vlerësuar në mënyrë kritike periudhat e historisë tonë!zogut jepi të mirën dhe të keqen,komunizmit të mirën dhe të keqen!sado të vogla a të mëdha qofshin,por jepi hakun!por të kishim bërë një gjë të tillë nuk do tëishim këtu ku jemi!nuk do të ishim të ndarë në nihilistë e glorifikues!do të kishim mësuar si nga të mirat dhe të këqijat e historisë sonë!!ne jemi këtu ku jemi sepse gjithnjë jemi në luftë me njeritjetrin për të mohuar o glorifikuar miqt e armiqt e njëritjetrit!!ka lubonjëra që hanë bukë me këtë,përndryshe do të kishin vdekur urie!tipat e lubonjës hiqen anti konformistë përsa kohë nuk ka të bëjë me ta direkt!po të ketë të bëjë me ta personalisht të hanë gërrmazin!!nuk të lënë gjë pa pështyrë!!po tu prekësh personalen,dhe atë të shkuarën nuk shohin më nga sytë!!ta bëjnë të bardhën të zezë ose të kundërtën kur të duash!dhe su prish punë se ato që shkruajnë janë jashtëqitje e vërtetë!!nuk ëhstë se u mungon aftësia për të shkruar drejt dhe me vënd!si vet lubonja dhe kol cukali kanë shkruar e kanë kapur tema aq të forta sa ja vlen ti përgëzosh,por po gjykuan me emocione këthehen në njerëz pa llogjikë!e lëshonjë budallallëkun pa problem!prandaj artikujt ju dalin çorbë!!

Ja ke fut kot, se nga korriku

Ja ke fut kot, se nga korriku e ketej e ka share nja dy here Berishen! Habitem sesi valle Lubonja, nje njohes cdo gjeje qe mund te perceptoje truri i njeriut i ka shpetuar Enverit!!! Duhet ti thuhet stop Lubonjes dhe fenomenit "lubonjari", elektricistit qe ben dhe hidraulikun, etj etje pa fund

Koloreto! Ja ke hequr

Koloreto! Ja ke hequr ngjyrat fare mor burre. Gjithe ata mijra njerez qe shkuan ne varrimin e Vaces mos ishin gje konformiste? Mos u genjyen nga titrat?Vaces ate tekst i dhane dhe ate kendoi. Ne i vleresojme zerin, tingullin, embelsine e tij. Deri me sot nuk eshte arritur ne Shqiperi zeri i saj.  Po ti do nje tekst " O sa kam bythen e mire", dhe ta mxjerresh jashte bashke me gjoksin. Kjo qe ke thene o Kolor, eshte sikur Lubonja te kete dy bythe, nje ta caje e nje ta mbaje. Sepse i duhet nje bythe Lubonjes te ndyje cdo gje qe shkelqen.

Billy duke mos dash me te heq

Billy duke mos dash me te heq asnje presje do shtoja: Duhet ti themi gjerat troç Koloreto pamvarsisht se te rrespektoj! Eshte shume e turpshme te hedhesh ne leter cdo gje edhe pse ke nje opinion tendin per te! Ne nje dite me Vaçen ky komb paska humbur edhe pene-hollet apo si??? Nese dikush do te paguante Blendi Fevziun te bente nje emision per japrakun, Lubonja do ishte aty, por jo Vaçja as Gaçe, ti jo e jo... Atehere kush e ngacmoi Lubonjen me shkop? Pse ti nuk e le te zere kore ???

E lexova me vemendje shkrimin

E lexova me vemendje shkrimin e Koloreto Cukalit. Une jam i sigurte se Koloreto do t'i lexoj keto fjale qe po shkruaj poshte tekstit te tij.Vace Zela ka kenduar kenge te rralla, te denja per repertorin e divave boterore. Kadare ka shkruar vepra qe jane perkthyer ne gjuhet me te medha te globit, eshte nje nder shkrimtaret me te rendesishem te gjalle qe sot ka njerezimi. Jane kaq te thjeshta, te vertetueshme, ashtu sic e provojme cdo dite lindjen e nje dite te re. Dhe per fatin tone te mire, edhe pse ishte kohe diktature, edhe pse merhumi u rrinte mbi koke me shpate ne dore artisteve shqiptar dhe jo vetem, gjate 40 viteve eshte bere art i njemendte.Prandaj Vace Zela eshte natyrshem ne Panteonin e Artit te Kombit tone. Eshte aty, nuk mund ta largoj Lubonja as Koloreto. Por si e lexoj une ate qe ka shkruar Lubonja? Si i lexoj une ato qe shkruan Koloreto? Lubonja provokon, dhe nuk eshte rasti i pare qe e ben dicka te tille, sidomos me figurat qe kane ngjyrime te theksuara kombetare, duke filluar qe nga Skenderbeu. Koloreto i mban ison. Te dy perpiqen te sfumojne Kadarene. Nese Lubonja kuptohet lehte pse e ben kete, Koloreto nuk ka sens t'i mbaj ison.  Te besh gazetari "ndryshe" duke bere salierin nuk besoj se eshte vlere e vecante. Sepse ky shkrim do harrohet me siguri, ndersa kenget e Vaces dhe romanet e Kadarese do degjohen e lexohen edhe pas 20, 30, 40 e 100 vitesh! Te jeni i sigurte Koloreto, te jeni i bindur Lubonja, keshtu do te jete. Keshtu do te ndodh, po nuk shkruat ju dicka me me vlere se sa Kadare. Po them per te shkruarit, sepse ketu perpiqeni te leni shenjen tuaj. Por qe ta lini ate (shenjen), duhen kellqe dhe talent, miku im.

sot po shkruhet shumë dhe si

sot po shkruhet shumë dhe si përfundim PËR LUMË!!jo gjithnjë,por shumica shkruajnë me një cektësi të tmerrshme për të ardhur keq deri në ulërimë!!ka një nihilizëm që pasqyrohet me një mosnjohje të realitetit të dikurshëm!ose më mirë të themi me një mohim,rrafshim të atij realiteti!sot analiza e atyre viteve,jetës në diktaturë vlersohet vetëm një ngjyrëshe,as bardh e zi jo!“të gjithë ishin kundër”,”të gjithë kanë vuajtur”,”të gjithë kanë qënë të detyruar”!në krahun tjetër po të mos thuash se kam qënë disident,kundërshtar,do të thotë se duhet të pranosh se ke qënë diktatura vetë!është fshirë nga defteri tërë ajo masë e madhe njerëzish që besuan në atë ideollogji,që punuan dhe u përpoqën me tërë forcat për të ndërtua një shtet,shqipërinë!!unë mendoj se vaçja ishte një nga ata njerëz që dha atë që kishte mundësi për shqipërinë tonë!unë nuk e kam vlerësuar si propaganduese të vijës së partisë,por si këngëtaren e patriotizmit shqiptar,lirikës shqiptare dhe një zë të mbrekullushëm që dilte mbi shpesh mediokren!!që zbukuronte jetën e atyre viteve!vaçja de juro filloi largimin pas fillimit të viteve ’80,vite që ndoshta përkojnë me humbjen e besimit të saj në atë propagandë që bëhej nga diktatura!!ndoshta ajo kuptoi se jo çdo gjë që propagandohej ishte aq e pastër!ndryshe nga të tjerë që në atë kohë patën lulëzimin e tyre,ngritje në karrierë(nëpërmjet luftës së klasave,spiunimeve të ndyra)ajo u largua pa bërë zë!u largua dhe kur të tjerët nga promotorë të luftës së klasave u këthyen në disidentë,në demokratë!ajo u largua sepse e pa se atje ku ajo kishte besuar ishte një flluckë sapuni!!e fryrë nga kadaretë,pashkot,berishat e turrli soj e sorrollopi!njerëz të pafytyrë që pasi çfrynë flluckën e parë krijuan të dytën!!sot është e njëjta gjë!!ka shumë njerëz të zhgënjyer nga të njëjtit njerëz vazhdojnë e luajnë të njëjtën komedi!!shfrytëzojnë njerëzit e ndershëm që duan një shtet demokratik të begatshëm,thjeshtë për të përfituar për egoizmin e tyre,për tu pasuruar për të qënë të pushtetshëm!!sot përveç sulmeve që bëhen për të shkatërruar kulturën,atdhedashurinë,historinë një agresion i vërtetë bëhet kundër dëshirës për të punuar për shtetin tënd,për vëndin tënd!!sot të cilësojnë nacionalist,komunist,bile dhe fashist po të thuash se kam dëshirë që shtei tim të shkojë përpara,se unë punoj për të!!sot të quajnë për injorant nëse dëgjon këngë atdhetare!!të gjitha cilësohen komuniste e turrli injorance tjetër!!maksimumi që sot mund të pranohet,dhe kjo vetëm në teori,është të luftosh për atdheun!!e thashë në teori se më pas ndyrësirat të quajnë kriminel!!shkrimin absurd të lubonjës unë personalisht nuk e kundërshtova për “debilitetin masiv”,nuk e kapa,a nuk më bëri përshtypje,por e kundërshtova për absurditetin e argumenteve të tij!e kundërshtova për “vujajtjen që ai kisht kaluar gjat dëgjimit të këngëve të vaçes”,sikur ajo ti kishte vajtur personalisht në vesh e I këndonte për ta torturuar dhe jo sikur ajo këndonte për një popull të tërë,pa e ditur kush e dëgjonte!!kush e pëlqente e kush torturohej se nuk dëgjonte “ki non lavora nun fa l’amore” të çelentanos!njëlloj sikur unë ti them lubonjës ti je “njëlloj si ajo(vaçja që ai përshkruan)sepse me kromin që ke nxjerrë ti është “çarë bllokada”ka mundësuar zgjatjen ditve të diktaturës!e kundërshtova për absurditetin se këngät e vaçes nuk mund të vallzoheshin në një kohë që shpreh një nostalgji prej inferiori për çelentano e rollingstons!harron i shkreti lubonjë se ai që di të kërcejë,kërcen dhe me zhurmë e jo më me muzikë!harron “eruditi”lubonjë se kërcimi bëhet sipas muzikës!harron se kërcimet e çdo lloji,epoke muzikore janë të ndryshme dhe të përshtatura me muzikën!!e mbështeta lubonjën për përplasjen në fytyrë të ramës hipokrizinë e tij!hipokrizinë e politikanit të paskrupullt që se ka problem të kapërdijë ngjala dhe të mbajë fjalime elektorale dhe në funeralet e atyre që pështyn çdo ditë me fjalët e tij direkte dhe indirekte!!ashtu si mbështes dhe vetë cukalin në këtë rast për “titrat”e tij por që në të njëjtin artikull fillon “me luftën në vjetnam dhe përfundon me ndërzimin artificial”!ku titrat dhe përmbajtja janë si ato që ai fillon e kritikon,thjesht,PA LIDHJE!ku sjell shëmbuj të “kulturës botërore”xhejms dinin dhe merlin monron!?sikur ata që i kanë dhënë me të vërtet botës të ishin posht ngritjes së entuziazmit të trupave amerikane në kore,ose seksit tresh të merrlinit ose më posht se masturbimet në publik të xhejms dinit!!për edit piaf nuk kam se çthem!!francezët nuk kanë lubonjë e cukal,përndryshe me shkelma kishin për ta zënë!!për mendimin tim ky është një nga artikujt e sforcuar, të detyruar për tu shkruar,të cukalit!(para pak kohësh pati një të tillë)prandaj ka pjellë,prap një paçavure!

Ramonet e Vace Zeles dhe

Ramonet e Vace Zeles dhe kenget e Kadarese, lexohen e kendohen vetem nga...1. bga ata qe formuan shijen e mendimin ne kohet e Qoftelargut2, nga ata qe pas viteve '90 nuk lexojne me e as degjojne muzike tjeter3. nga ata qe kane nostalgji per "...lumturine" e asaj kohe!Keto thoshte pak a shume Lubonja, sipas leximit tim.Perderisa po per-afroni Vacen me Kadarene, mos doni te thoni se edhe Kadare thjesht "kendoi" dhe s'mban pergjegjesi per cfare efekti shkaktuan (sidomos) poemat e tij, por jo me pak romani "Dimri i Madh" (Hrushovianet) si  dhe romani "Shenime per Kinen"?!Apo meqe bje Kadareu, le te bjere edhe Vacia!

diferencë pa moral! në këtë

diferencë pa moral!në këtë përmbledhje bardhë e zi,më shumë zi,që ti i ke bërë leximit tënd të shkrimit të lubonjës,nuk mund të të them gjë tjetër veçse je gabim!!gjithnjë mendimi tim,jo i "zotit"!nuk e di përse u nderua vaçja,për nostalgji të komunizmit,për zërin e saj a për karrakterin e saj,por mund të të them me plot bindjen se kur të shkojë lubonja nuk ka për të pasur nostalgji askush(pothuajse) për të!!do të kujtohet aq sa dhe shoku i tij i provokimit,antikonformizmit kozmopoliti klosi!!tipat e lubonjës nuk lënë emër,nostalgji rrallë kujtohen!sa për nostalgjinë e "lumturisë" të asaj kohe,do të të thosha një gjë,hamëndje timen!hamëndje që bazohet në historinë e shqipërisë!ndoshta do të ishim po kaq të lumtur sa sot!!ndoshta do të kishim qënë të lumtur si gërk apo sërbë!këtë nuk mund ta them por vështirë se do të kishim qënë të lumtur!!në atë kohë të "lumturisë"së vaçes të paktëm ishim shqiptar!!mua si jo kozmopolit,më mjafton kjo për ta parë realitetin me sy hapur dhe jo me sy mbyllur!!ps:shpresoj që të kesh ndopak vite në kurriz e jo të jesh ndonjë produksion i indoktrinuar që kritikon indoktrinimin tonë të atëhershëm!!

Shoqëria e titraxhinjve

Comments

Sh sakte Koloreto. Bravo!

migena po aq e madhe sa dhe

Migena, sakte ky shkrim per

Te gjitha po ti bej hallall

Gazetarët dhe shoqëria e

shtjellim i shkelqyer. gjerat

"Vaçja ishte një artiste

"Kritiket e fytyres se

"Figura qe nuk qendrojne dot

Është lehtësisht i kuptueshme

Me fal mor zoti Pepkola, por

Koloreto shkruan: "...Ne

ne fakt kujtoja se titullin e

Mire o Koloreto, mire, se

Mos valle ka ardhur koha te

alidemso "Perse ne duhet te

Ja ke fut kot, se nga korriku

Koloreto! Ja ke hequr

Billy duke mos dash me te heq

E lexova me vemendje shkrimin

sot po shkruhet shumë dhe si

Ramonet e Vace Zeles dhe

diferencë pa moral! në këtë

Add new comment

Plain text

You are here

Shoqëria e titraxhinjve

Comments

Add new comment

Plain text