Nexhmije.com apo Shqiptarja.com

Më duket zoti kryeministër se ju kishte marrë malli për mua, përderisa e bëtë këtë në konferencë për shtyp, pra publikisht. Në fakt, nëse nuk e keni marrë vesh, isha në Kabul, e përzgjedhur nga NATO për tëndjekur zhvillimet larg vendit tonë, aty ku fliten politika globale,  aty ku ndjehesh krenar se je shqiptar, dhe sikurse unë e kam thënë në facebook, (meqë kam marrë vesh se keni hapur edhe ju faqe në facebook), në Shqipëri, ne nuk jemi as si në Kabul, e as si në Kandahar. E ja ku kthehem në atdhe. Me dëshirën për të sjellë në vendin tim disa mendime evropiane e ndërkombëtare. Hap celularin, e ç’të shoh. Lum mesazhesh e telefonatash, sepse në një konferencë për shtyp, ju zoti kryeministër, mua personalisht dhe gazetën shqiptarja.com i kishit bërë personazhet tuaja, duke i thënë gazetares së shqiptarja. com se vinte nga nexhmije.com. Nuk është hera e parë që ma thoni këtë gjë. E mbani mend? Ka ndodhur në ceremoninë e zgjedhjes së Bujar Nishanit si President. U afruat duke qeshur te unë dhe më thatë se ju dukesha sikur të më kishte lindur Nexhmija... Dhe unë duke qeshur ju thashë se më mirë të isha një ndër kalamanjtë e Nexhmijes sesa tuajët, se nuk i dihej fundit... Zonja Liri Berisha, ju mori mënjanë, për të bërë takimet e tjera, por ndërkohë kjo që u tha, mbeti. Pas kaq ditësh, kemi arritur në një zhvillim të ri, ju keni evoluar nga kalamani i Nexhmijes, te Nexhmija vetë. Tani për çështje moshe po ju them se kalamanjtë e Nexhmijes, kanë kalamanjtë e tyre në moshën time, ndaj në këtë aspekt, kjo nuk më prek aspak. Si gazetare, me 18 vjet eksperiencë në median shqiptare po ju them se etiketimi juaj, sado ironik apo qesharak ndaj një gazetareje të re, për shefen e saj, është banal, frustrues, intimidues dhe aspak serioz për një kryeministër. Unë kam qenë në konferencat tuaja ballë për ballë me ju. Dhe nuk ma keni thënë ndonjëherë këtë krahasim. Nëse nuk e mbani mend, po ju kujtoj se në konferencën e fundit, ju kujtova se ju kishit mbajtur për 20 vjet teserën e Partisë së Punës në xhep. Por në përgjigjen tuaj, nuk gjeta asnjë lloj ironie, përveçse një përgjigjeje serioze. Tani, nëse keni shfrytëzuar faktin se në conference  nuk isha unë, por një ndër gazetaret e stafit tim, keni bërë gabim. Mendoj se ne shqiptarët kemi një gjë të qartë: kemi ç'kemi, t'a themi ne sy, nuk ua themi të tjerëve. Dhe me thënë të drejtën, kjo mua më zhgënjeu për mënyrën sesi e trajtuat gazetën. Shqiptarja.com është një gazetë që lindi nëntorin e kaluar, dhe këtë nëntor të 100 vjetorit të pavarësisë mbushi vetëm 1 vjeç. Më vjen mirë zoti kryeministër që është ngulitur në mendjen tuaj si një gazetë me të cilën e filloni ditën tuaj të punës nëse jo të parën, ndër të parat që lexoni. Ky fakt, stafit që unë drejtoj, i jep më shumë vlera, duke menduar se për shumë çështje, ne i vëmë pikat mbi "i". E nga ana tjetër, më duhet të them, se shumë drejtues gazetash që falen te ju nga mëngjesi deri në darkë, merren aq shumë me Nexhmijen, saqë më duket krejt e padrejtë që ju të bëni etiketime të tipit "kur nuk ke ç'i bën gomarit, i bie samarit". Dhe ndër më të fundit, nuk kam asnjë kompleks ndaj Nexhmije Hoxhës. Nuk ka qenë ndonjëherë eprorja ime, mesa di, ka qenë e juaja. Nuk kam qenë ndonjëherë në pushime me Nexhmijen, mesa di, ju ia keni kaluar shumë mirë në kohën e komunizmit me familjen e saj apo edhe me atë vetë. Nuk kam marrë ndonjëherë urdhëra nga Nexhmija. Mesa di, ju dhe të tjerë si ju e kishin aq frikë asaj që sot i thoni "Pantera e Zezë", sa sot më duket një lojë me "gjasme" për të pastruar të kaluarën. Meqënëse vij nga Kabuli, po ju them zoti kryeministër: e kaluara e një vendi, nuk harrohet kollaj duke e rikthyer atë nga mëngjesi deri në darkë. E kaluara e një vendi, në përpjekjet për ta bërë jetën e fëmijëve të fëmijëve të tu më të mirë, ashtu sikurse edhe mua nesër për fëmijët e mi, bëhet duke respektuar njëri tjetrin, për vlerat që kemi, për ato që themi, për ato që bëjmë, dhe për ato që kontribuojmë për vendin tonë. Unë këtë po e bëj zoti kryeministër, dua të di: Po JU?