Hetimet, na ka vjedhur CEZ-i. Pse, vetëm ai?

Shtypi dhe media vizive jane mbushur keto dite me lajme mbi nisjen e hetimeve nga Prokuroria ndaj kompanisë së shpërndarjes së energjisë elektrike, CEZ Shpërndarja pas denoncimit të një qytetari , sipas të cilit, çekët mbifaturojnë abuzivisht qytatarët, madje vjedhin edhe shtetin.

Për aq kohë sa kjo çështje po hetohet, nuk na lejohet të bëjmë komente mbi faktin nëse CEZ është i fajshëm apo jo. Ndoshta për të bërë një vlerësim subjektiv vlen eksperienca e secilit gjatë këtyre dy viteve e ca, që kur CEZ ka marrë shpërndarjen.

Por nëse i marrim të mirëqena akuzat, a mund të themi se është vetëm CEZ ai që na vjedh? Jo. Ne vidhemi tek pesha e bukës, orizit, sheqerit, tek sasia dhe cilësia e karburantit, djathin na e bëjnë me niseshte, bukës së zezë i shtojnë pigment, të bardhën e mbysin me maja, domatet dhe perimet e tjera i pjekin me zor me injeksione, etj etj.

Madje edhe nëse nuk na vjedhin, gjejnë lloj lloj marifeti për të nxjerrë përfitime shtesë në kurrizin e konsumatorit. Për të gjitha këto, organet mund të nisin një hetim të ngjashëm me atë të CEZ-it. Fundja, pjesën më të madhe të PBB-së sonë e përmbën konsumi, prandaj kjo kërkon një vëmendje më të madhe të autoriteteve.

Ky është sinjal pozitiv që Prokuroria nis hetimet (nga rastet e rralla përveç atyre flagrante) me akuzën e abuzimit, por le të shërbejë kjo si një gur themeli në drejtim të mbrojtjes më të madhe të konsumatorit.

S.E.