Berisha duket se e ka kopsitur edhe Gjykatën Kushtetuese

Gjykata Kushtetuese ka hedhur poshtë me 5 vota kundër dhe 4 vota pro kërkesën e një grupi deputetësh socialistë për “Shpalljen si të papajtueshme me Kushtetutën e Republikës së Shqipërisë të neneve 3, 5, 6, 8 të ligjit nr. 10.449, datë 14.7.2011 “Për rregullat dhe procedurat e ndërtimit të kompleksit të ri parlamentar të Kuvendit të Shqipërisë”. Ky vendim i hap rrugën ligjërisht prishjes së Piramidës.

Justifikimi për vendimin ka qenë mungesa e legjitimitetit të kërkuesit për t’iu drejtuar gjykatës për një çështje të tillë. Gazeta Mapo raporton se burime të saj nga Gjykata Kushtetuese kanë bërë të ditur se argumenti me të cilin shumica e anëtarëve të kësaj gjykate kanë rrëzuar këtë kërkesë duket se ka pasur të bëjë sërish me anën procedurale, pra legjitimimin e kërkuesit. Sipas këtyre burimeve, trupa e gjyqtarëve, pasi ka marrë në shqyrtim argumentet e paraqitura nga palët në seancën plenare të 23 nëntorit, ka arritur në përfundimin se kërkesa ka në thelbin e vet zgjidhjen e kompetencave mes pushtetit qendror dhe atij vendor dhe, për rrjedhojë, deputetët socialistë nuk kanë interes direkt që mund t’i legjitimojë në një proces të tillë gjyqësor.

Pra, siç kanë vepruar edhe gjykata të tjera në çështje që kanë qënë të përfshirë zyrtarë të lartë të mazhorancës, Gjykata Kushtetuese duket se nuk është futur fare në shqyrtimin e përmbajtjes apo argumenteve, me të cilat kërkuesit mbështesnin kërkesën e tyre për shfuqizimin e disa neneve të ligjit në fjalë. Ajo është marrë vetëm me procedurën. Përbërja e saj ka ndryshuar kohët e fundit, kur disa anëtarë të rinj të saj janë zgjedhur me votat e mazhorancës.

E.Zaloshnja