Zbulohet baza e veprave të artit të vjedhura

Katër persona nën akuzë. Arben Spaho kishte një dyqan te “Don Bosko”, shiste piktura të Vangjush Mios

Policia e Tiranës ka zbuluar një bazë ku trafikoheshin vepra arti të vjedhura. Katër persona janë vënë nën akuzë, ndërsa deri dje në mbrëmje policia konfirmoi se ka arrestuar njërin prej tyre, pikërisht shtetasin Arben Spaho. Sektori antitrafik ka kryer një hetim të gjatë për këtë grup dhe nga verifikimet ka rezultuar se veprat e artit të vjedhura, kryesisht piktura dhe skulptura, ishin marrë në Qendrat Kulturore të Korçës dhe Pogradecit. Madje, ka dyshime se disa prej pikturave të vjedhura i takojnë pikërisht Vangjush Mios, një skandal që doli në dritë një vit më parë, gjatë një inventari në Qendrën Kulturore të Korçës. Policia e Tiranës tregohet e rezervuar në dhënien e informacioneve, ndërsa mësohet baza e veprave të vjedhura të artit në rrugën Don Bosko.

“Në pranga ka rënë Arben Spaho, me origjinë nga qyteti i Pogradecit. I arrestuari banonte në Kamzë dhe dyshohet se e kryente prej kohësh këtë aktivitet kriminal. Gjatë kontrollit të bazës në rrugën Don Bosko në Tiranë dhe në shtëpinë në Kamzë, agjentët e antitrafikut kanë sekuestruar ikona, të cilat dyshohet se janë të vjedhura në qendrat kulturore të Korçës dhe Pogradecit”, pohojnë burimet nga policia.

Megjithatë, një nga të rejat e hetimit është se këto piktura mund t’i përkasin edhe Vangjush Mios, të vjedhura kohë më parë në Qendrën Kulturore të Korçës, skandal i cili vuri nën akuzë përgjegjësit e kësaj qendre. Një nga të pandehurit u shpall i pafajshëm, ndërsa për dy të tjerë vijon gjykimi. Mësohet se agjentët e antitrafikut kanë prova që këto vepra arti janë vjedhur në Korçë disa kohë më parë, ndërsa është zbuluar edhe rrjeti i trafikimit.

“Janë identifikuar disa persona, të cilët kryenin këto vjedhje, në bashkëpunim me disa persona në Korçë dhe Pogradec. Organizatori i kësaj skeme ka qenë padyshim Arben Spaho, me origjinë pikërisht nga Pogradeci. Ai kishte disa të njohur në qytetet juglindore, nga ku arrinte t’i shiste këto piktura në treg të zi”, pohojnë burimet, ndërsa mësohet se ditën e sotme do të bëhen publike detajet e këtij operacioni.

Shqip