Topi në Dibrën e Madhe: Posti nuk është privilegj, por përgjegjësi historike

Kryetari i FRD-së, Bamir Topi ishte në Dibrën e Madhe me rastin e festës së 100 vjetorit të shtetit shqiptar. Topi, i cili është njëherësh dhe qytetar nderi i komunës së Dibrës së Madhe, u prit në takim të veçantë nga kryetari Argëtim Fida dhe drejtues të tjerë të komunës.

Topi uroi komunën e Dibrës së Madhe dhe të gjithë qytetarët shqiptarë në Maqedoni për 100 vjetorin e pavarësisë dhe krijimit të shtetit shqiptar.

“Festat janë ngjarje të rëndësishme që duhet të bashkojnë qytetarët, pavarësisht flamujve partiakë edhe në respekt të sakrificës dhe të flamurit kombëtar. Brezat e sotëm u janë përjetësisht mirënjohës etërve themelues të cilët vunë interesat kombëtare mbi këdo interes tjetër. Të gjithë jemi krenarë kur shohim se pas 100 vitesh kemi një faktor shqiptar të fortë, aktiv dhe garantues të paqes në rajon, se shqiptarët janë e mbeten një komb evropian dhe me vokacion perëndimor dhe se midis shqiptarëve nuk ka opozitë në përkushtimin dhe përcaktimin tonë për integrim e bashkim në Bashkimin Evropian,” tha Topi.

“Politika dhe ata që marrin vendime për qytetarët dhe interesat e vendit duhet ta kuptojnë detyrën e tyre jo si një privilegj e të drejtë personale, por si një përgjegjësi historike, një shans për të dhënë një kontribut modest për vendin, dhe se sot është koha të dëshmojmë më shumë vlera e angazhim në forcimin e shtetit të së drejtës, vlerave evropiane dhe problemeve të qytetarëve shqiptarë, kudo ata ndodhen,” vijoi Topi.

Tema