Topalli: Demokratët i dolën zot partisë së tyre

Jozefina Topalli e konsideron procesin e zgjedhjes së kryetarit të PD-së një proces emancipues, të civilizuar e demokratik. Në një postim në Facebook pak kohë pas shpalljes së fitores së Lulzim Bashës, Topalli shkruan se me procesin e djeshëm, demokratët treguan vullnetin e fortë për t’u ringritur.

“Në një moment të vështirë të Partisë Demokratike, demokratët u ngritën për t’i dalë zot partisë së tyre! Me pjesëmarrjen e tyre në çdo takim, gjatë dy javëve të fushatës për zgjedhjen e kryetarit të ri të Partisë Demokratike, me qytetarinë dhe emancipimin e tyre, demokratët dëshmuan shpirtin e idealeve, mbi të cilat u lind dhe punoi kjo parti.

Të vetëdijshëm për nevojën e ringritjes, të vendosur për t’i dalë zot asaj, në ditë të vështira, të bindur se Partia Demokratike kishte nevojë më shumë se kurrë për anëtarësinë e saj, demokratët e bënë garën një proces emancipues, të veçantë, të civilizuar dhe demokratik.

Sot, Partia Demokratike ka një kryetar të ri dhe uroj që ai t’i çojë sa më shpejt demokratët drejt fitores! Mirënjohje të thellë anëtarëve dhe anëtarëve të Partisë Demokratike për shpirtin e tyre të paepur, zemrën e tyre të madhe, besimin dhe vullnetin e fortë për t’u ringritur! Jozefina”, shkruan ajo.

DITA