"Stacioni rrugor Ad Quintium" drejt shkatërrimit

"Stacioni rrugor Ad Quintium" është një nga ndërtimet më të rëndësishme të kryera nga ana e Romakëve gjatë shekullit XII-XIV. 

Ky stacion mjaft i njohur ndodhet përgjatë rrugës së famshme " Egnatia", jo shumë larg nga qendra e qytetit të sotëm të Elbasanit. Rrënojat e këtij stacioni janë evidentuar në fshatin Bradashesh pranë qytetit, që ndodhet në kilometrin e shtatë të rrugës automobilistike Elbasan - Peqin, në vendin e njohur në popull me emrin "Kalaja". 

Bazuar në gjetjet e ndryshme dhe teknikën e ndërtimit, kjo qendër daton në shekujt 2 - 4 mbas Lindjes së Krishtit. 

Sipas banorëve të kësaj zone "Stacioni rrugor Ad Quintium" prej disa vitesh gëzon statusin e Monumentit të Kulturës, por përkujdesja ndaj tij, ka qenë e papërfillshme nga ana e Institutit të Monumenteve të Kulturës. Aktualisht "Stacioni rrugor Ad Quintium" në Bradashesh të Elbasanit është drejt shkatërrimit të plotë të tij. 
Është për të ardhur keq që një Monument me kaq vlera të lihet në mëshirë të fatit ndërsa ai gjithnjë e më shumë vizitohet nga një numër i madh turistësh vendas e sidomos nga të huajt. 

Disa shekuj më parë "Stacioni rrugor Ad Quintium" shfrytëzohej maksimalisht nga tregtarët e asaj kohe jo vetëm për shërbimin e asaj që sot e quajmë hoteleri, por edhe për banjot termale sepse në atë periudhë ai identifikohej edhe si një stacion mjaft i rëndësishëm termal në një nga nyjet më të qarkullueshme të rrugës "Egnatia". 

Rreth dy vite më parë nga ana e pushtetit vendor të komunës së Bradasheshit u bënë disa përpjekje për të frenuar shkatërrimin e "Stacioni rrugor Ad Quintium". Por, këto përpjekje nuk shkuan më shumë sesa në pastrimin e shkurreve e ferrave në zonës ku ndodhet "Stacioni rrugor Ad Quintium". Puna e komunës së Bradasheshit u finalizua me mbulimin e një pjese të tij me çati dhe asgjë më tepër sesa kaq. 

Mundësitë për të bërë më shumë nga ana e kësaj komune nuk mungojnë, por drejtuesit e saj preferuan që fondet t’i akordojë Instituti i Monumenteve të Kulturës i cili e ka në inventar "Stacionin rrugor Ad Quintium" i cili renditet ndër 20 Monumentet e Kulturës më të rëndësishëm të Elbasanit. Mirëpo "Stacioni rrugor Ad Quintium" momentalisht është lënë në harresë nga ata që paguhen për ruajtjen dhe mirëmbajtjen e tyre, por jo nga vizitorët të cilët shokohen që vlerat e tij po injorohen nga të paaftët dhe burokratët e Institutit të Monumenteve të Kulturës. 

Fatmir Popja

Ballkanweb.com