Shkarkimet politike të qeverisë “Berisha” në administratën e shtetit

Administrata

Arkiva/ Gazeta “Shqip” risjell denoncimet e bëra gjatë viteve 2006-2007 për shkarkimet në administratë

Herion Mesi

Politika shqiptare vijon ta trajtojë administratën publike si një monopol të saj, pasi mazhoranca dhe opozita po e vlerësojnë në mënyra të ndryshme reformimin e paralajmëruar në administratën shtetërore nga Kryeministri Edi Rama. Debati lidhur me ligjin konsensual të nëpunësit civil dhe aktit normativ që qeveria e re miratoi pak ditë më parë, që parashikon plotësimin e këtij ligji për një periudhë kohore 6-mujore, ka bërë që opozita e djathtë të sulmojë mazhorancën e majtë me akuzën se me këtë akt normativ, Rama kërkon të justifikojë dhe shkarkimet politike në administratën shtetërore.

Por, çfarë ndodhi në administratën e shtetit pas zgjedhjeve të 3 korrikut 2005, me ardhjen në pushtet të demokratëve?

Presione dhe shkarkime në administratë që vijonin pa ndërprerje edhe pas gjashtëmujorit të parë të qeverisjes nga kryeministri Sali Berisha. Nga denoncimet e publikuara në mediat e asaj kohe, si dhe nga vetë gazeta “Shqip”, por edhe nga të dhënat e marra pranë Komisionit të Shërbimit Civil, në janar të 2006-s, ka rezultuar se pjesa më e madhe e largimit nga detyra kanë qenë me motivacion politik, ku ka munguar transparenca dhe respektimi i ligjit. Por edhe në rastet kur janë marrë vendime për rikthimin në punë të punonjësve të larguar nga puna pa shkak, institucionet të cilat janë të detyruara t’i zbatonin këto vendime, nuk i kanë marrë parasysh ato. Si pasojë e kësaj reforme u zhvilluan ndryshime strukturore të organizimit të administratës publike, ku një pjesë e administratës është shkrirë dhe një pjesë e saj u rinovua me personel të ri. Për pasojë, kjo reformë u shoqërua me largime të padrejta nga puna, ku gjatë vitit 2005-2006 ka pasur shumë raste të largimit të personave nga detyra. Përveç largimit nga detyra, ka pasur edhe masa disiplinore, për të cilat personave të larguar me pa të drejtë nuk u është krijuar mundësia për të dhënë sqarime dhe për t’u mbrojtur.

Për largimet nga administrata pas zgjedhjeve të përgjithshme më 3 korrik 2005 u ngrit dhe një komision hetimor parlamentar që drejtohej nga deputeti socialist Blendi Klosi. Por hetimi parlamentar përfundoi në dy raporte vlerësuese krejt të kundërta të mazhorancës dhe opozitës së atëhershme, duke e shndërruar këtë çështje në një debat politik me gjykim bardhezi. Konkretisht, gazeta “Shqip” rikthen për lexuesit sot, të gjitha shkarkimet apo dhe presionet e qeverisë së djathtë e denoncuar nga gazeta “Shqip” që iu bënë punonjësve të administratës së shtetit, pas datës 13 mars të vitit 2006 e në vijim.

13.03.2006

Këshilli Drejtues i Radio Televizionit Shqiptar lajmëron se do të nisë procedurat për shkarkimin e drejtorit të përgjithshëm Artur Zheji, me akuzën për militantizëm politik, pasi përkrahu totalisht qeverinë “Nano” para zgjedhjeve të 3 korrikut dhe pas këtyre zgjedhjeve ai doli në përkrahje të qeverisë së re “Berisha”.

13.06.2006

Ndërkohë, në të njëjtën ditë, nis faza e dytë e furtunës së shkarkimeve në Policinë e Shtetit nga ministri i Brendshëm i asaj kohe, Sokol Olldashi. Paralajmërohet edhe shkarkimi i drejtorit të përgjithshëm të Tiranës, Bajram Ibraj (një masë kjo që do të merrej pesë muaj më pas), i cili do të zëvendësohej në atë kohë nga Ahmet Premçi. Sa u përket shkarkimeve të para, ato u shënuan vetëm pak muaj pasi demokratët erdhën në pushtet, kur u ndërmor një fazë e gjerë shkarkimesh dhe transferimesh nga detyra të efektivave të uniformave blu. Një furtunë që u shoqërua me rënien një nga një të të gjithë krerëve të qarqeve policore, të cilët u detyruan t’ua lënë vendin kolegëve që u ricikluan apo dhe ish-vartësve. Të vetmit që i rezistuan fazës së parë të këtyre shkarkimeve ishin drejtorët e Policisë së Tiranës, Shkodrës dhe Elbasanit. Ndryshimet në polici do të sillnin jo vetëm emra të rinj, por do të shënonin edhe rikthime të bujshme në atë kohë të ish-kolonelëve të larguar gjatë vitit 1997 nga Shqipëria.

17.03.2006

Kreu i Këshillit të RTSH-së, Kiço Blushi, do të detyrohej të jepte dorëheqjen nga detyra, për shkak të trysnisë politike që po ushtrohej në atë kohë mbi këtë institucion. Blushi, në largimin e tij, do të fajësonte pushtetarët e rinj të cilët ia bënë të pamundur qëndrimin në detyrë.

18.03.2006

Ministri i Drejtësisë, Aldo Bumçi, do të niste një valë të re shkarkimesh në drejtësi dhe gjyqësor. Masat e sigurisë dhe pezullimet e ekzekutimit të vendimeve bëjnë që katër gjyqtarë të Gjykatës së Tiranës t’i thonë “lamtumirë” togës së zezë. Ndërkaq, po kaq gjyqtarë të tjerë, sipas propozimit të Bumçit do të dërgohen në gjykata të rretheve më të vogla. Sipas masave të propozuara nga ministri i asaj kohe në Këshillin e Lartë të Drejtësisë, ai kërkoi largimin nga puna të gjyqtarëve: Fidea Osmani, Mimoza Kajo, Ilir Çeliku dhe Elona Gjoka. Ndërsa, për katër kolegët e tyre Gjin Gjoni, Kreshnik Omari, Ilir Mustafai dhe Fehmi Petku, Bumçi do të kërkonte transferimin e tyre.

19.03.2006

Qeveria “Berisha” rinis reformën në shëndetësi, duke reduktuar numrin e mjekëve në qendrën spitalore “Nënë Tereza”. Reforma e çuditshme e ndërmarrë nga ministri i Shëndetësisë i asaj kohe Maksim Cikuli parashikonte krijimin e balancës mes numrit të shtretërve të pacientëve me numrin e mjekëve në spitale. Grupi i punës që u ngrit nga Ministria e Shëndetësisë do të bënte dhe përzgjedhjen e mjekëve që do të vazhdonin punën në QSUT dhe atyre që do të vazhdonin punën në spitalet në rrethe. Një përzgjedhje që në asnjë moment të saj nuk u fol që do të ishte në bazë konkursi. Ndërkohë, varianti tjetër që aplikoi kjo ministri për realizimin e reformës, parashikonte transferimin e mjekëve nga Tirana për në vendet e tyre të origjinës. Nga hulumtimet e bëra nga gazeta “Shqip” në atë kohë, rezultonte se reparti i kirurgjisë kishte 31 shtretër pacientësh, të cilët kuroheshin nga 13 mjekë kirurgë. Dhe me zbatimin e kësaj reforme ky numër mjekësh do të reduktohej në 8 mjekë, por numri i shtretërve nuk do të ndryshonte. Pra, implementimi i reformës do të shkurtonte rreth 40 për qind të stafit mjekësor të repartit të kirurgjisë në QSUT. E njëjta formulë u zbatua praktikisht në thuajse të gjithë repartet e kësaj qendre spitalore.

30.03.2006

Qeveria “Berisha” dhe Ministria e Shëndetësisë vijon t’i mbajë nën presion mjekët e QSUT-së, duke shmangur shkurtimet drastike që parashikonte reforma “Cikuli” në QSUT, ku nga 300 mjekë fillimisht vetëm 30 prej tyre do të largoheshin nga puna, pra vetëm 10 për qind e stafit mjekësor. Ndërkohë që grupi i punës së Ministrisë, vlerësimin e mjekëve e justifikuan se u bë në bazë të aftësive. Por edhe pas kësaj vale, ky grup i ministrisë vijoi të qëndronte i ngritur dhe u përdor sa herë që ministri Cikuli do të ndërmerrte vendime për largime të njerëzve nga puna.

30.03.2006

Reforma në administratën tatimore nga qeveria e djathtë do t’i kushtonte vendin e punës 50 punonjësve të kësaj administrate. Shumica e të shkarkuarve ishin pjesë e policisë tatimore dhe 15 nga këta punonjës ishin nga Drejtoria e Përgjithshme e Tatimeve. Sa i përket kësaj reforme, lista paraprake e shkurtimeve parashikonte shkarkimin e 70 punonjësve, por nisur nga fakti se kjo nismë u ndërmor në një periudhë të mëvonshme kohore, kjo listë u reduktua në 50 punonjës, largimi i të cilëve kishte nisur para se lajmi të publikohej në media.

15.04.2006

Drejtori i Komisionit të Shërbimit Civil, Roland Përmeti, në prezantimin e raportit vjetor 2005-2006 të këtij institucioni do të denonconte publikisht shkeljet e bëra nga zyrtarët e qeverisë “Berisha” në zbatimin e ligjit “Për statusin e nëpunësit civil”, ku shqetësim për këtë institucion ishin shkarkimet e bëra në Ministrinë e Bujqësisë dhe atë të Financave. Në këtë raportim të tij, kreu i KSHC-së së asaj kohe, Përmeti, i bënte thirrje Departamentit të Administratës Publike që t’i rikthente në detyrë drejtorët e larguar nga reformat e demokratëve në administratën publike. Në raportin e tij, KSHC-ja do të theksonte se “12 mijë punonjës kanë punuar në administratën shtetërore para nisjes së këtyre reformave. Nga këta, 6 mijë punonjës kanë përfituar statusin e nëpunësit civil, ndërsa 350 punonjës janë pushuar nga puna”, do të shprehej në raportin e tij ish-kreu i KSHC-së, Roland Përmeti.

18.04.2006

Ministria e Brendshme e asaj kohe, që drejtohej nga ish-ministri Sokol Olldashi, nxori një njoftim tronditës për efektivat e Policisë së Shtetit, sipas të cilit, brenda muajit prill të vitit 2006 do të largoheshin të gjithë policët mbi 55 vjeç. Një reformë kjo që përtej deklaratës u ndërmor një vit më vonë, ku me një të rënë të lapsit do të shkarkoheshin nga puna mbi 1700 punonjës të Policisë së Shtetit.

24.04.2006

Partia Socialiste, dega e Durrësit, do të bënte bilancin 6-mujor të shkarkimeve në Doganën e Durrësit. Në këtë bilanc në pretekstin e reformave në administratë, do të rezultonte se për 6 muaj, qeveria “Berisha” kishte zëvendësuar 21 doganierë dhe dhjetëra punonjës të kësaj dogane ishin liruar në 6-mujorin e parë të qeverisjes së të djathtëve.

5.05.2007

Brenda një muaji, në Ministrinë e Shëndetësisë së asaj kohe, si pasojë e reformave të herëpashershme nga qeveria e djathtë, ishin larguar nga detyra mbi 20 drejtorë të kësaj ministrie. Veç stafit politik, rezultonte se ishin larguar nga puna edhe drejtorët dhe specialistët, ose kishte raste ku ata që më parë kishin qenë drejtorë, ishin emëruar si specialistë të thjeshtë.

20.05.2007

Rokadë sërish te tatimet. Qeveria do të shkarkonte nga detyra kreun e Tatimeve në Tiranë Sami Muka, pasi refuzoi që të ekzekutonte urdhrin e ministrit Genc Ruli për të shkarkuar nga puna punonjësit tatimorë, të cilët refuzuan hetimin ndaj “Top Channel”, i cili akuzohej për evazion fiskal nga qeveria “Berisha”. Në vend të Mukës do të emërohej në krye të tatimeve Dëshir Tuda, që më parë mbante detyrën e zëvendësdrejtorit të përgjithshëm të Drejtorisë së Tatimeve në Tiranë. Urdhri i ministrit Ruli, që u refuzua nga ish-drejtori Sami Muka, parashikonte që të shkarkoheshin nga puna 21 punonjës të drejtorisë së tatimeve të kryeqytetit.

 

 

Debati PD-PS

Demokratët gjatë këtyre ditëve kanë nisur një sulm të ashpër politik, teksa pretendojnë se Rama po heq specialistët dhe teknokratët dhe në vend të tyre po punësohen militantë, të cilët, sipas tyre, nuk plotësojnë kushtet. Nga ana tjetër, socialistët theksojnë se akuzat e opozitës janë të pabaza dhe garantojnë se lëvizjet do të kryhen në zbatim të reformave dhe garantojnë se nuk do të prekin pjesën e specialistëve, pavarësisht preferencave politike.

 

 

Raporti i 4 tetorit 2006

Partia Socialiste do të publikonte dhe konkluzionet e saj nga raporti i Komisionit Hetimor Parlamentar për shkarkimet në administratë 2005-2006:

1. 14 mijë e 74 është numri i nëpunësve të Administratës Publike të larguar nga puna

2. Reformimi i administratës ka prekur në një masë të madhe shërbimin civil, si dhe sektorë të ndryshëm të entit publik.

3. Nëpër ministritë e linjës është larguar nga puna 80% e stafit.

4. Nëpër institucionet e linjës është larguar/pushuar nga puna 87% e stafit.

5. Nëpër entet publike dhe degët në rrethe largimet nga puna dhe zëvendësimi i specialistëve me militantë ka qenë pothuaj në masën 100%.

6. Praktika e listës së pritjeve i ka sjellë shtetit një dëm prej 43 milionë eurosh, sepse për të njëjtin vend pune paguhet nga dy apo dhe tre herë.

7. Nëpër ministri, në 60% të rasteve drejtorët punojnë me një numër minimal specialistësh.

8. Sekretarët dhe drejtorët në Kryeministri janë punësuar me kontrata joligjore, duke penguar kështu aplikimin me konkurs për një vend pune. Madje, në disa raste, as nuk është bërë thirrje apo lajmërim për vend të lirë pune.

 

Largimet nga puna, sipas rretheve në periudhën shtator 2005-mars 2006

 

Malësi e Madhe 47

Shkodër 265

Pukë 49

Kukës 130

Has 38

Tropojë 23

Dibër 420

Bulqizë 65

Mat 94

Lezhë 130

Mirditë 90

Kurbin 70

Durrës 420

Krujë 61

Tiranë 4400

Kavajë 51

Rrogozhinë 44

Elbasan 185

Gramsh 78

Peqin 40

Librazhd 92

Fier 378

Mallakastër 190

Lushnjë 68

Berat 440

Kuçovë 78

Skrapar 46

Gjirokastër 400

Tepelenë 69

Përmet 49

Korçë 530

Kolonjë 70

Devoll 207

Pogradec 180

Vlorë 396

Sarandë 63

Delvinë 54

SHQIP