Sequi: Të plotësohet KQZ

Ambasadori i Bashkimit Europian në Tiranë, Ettore Sequi ritheksoi sërish shqetësimin për Komisionin Qendror të Zgjedhjeve, ndërsa kërkoi nga politika shqiptare që të arrijë në një kompromis për plotësimin e institucionit më të lartë të zgjedhjeve. 

"Ashtu sic e ka thënë edhe baronesha Ashton dhe komisioneri për zgjerimin Fyle, duhet të jetë një zgjidhje e pranueshme nga të gjithë. Për mendimin tim asnjëherë nuk është shumë vonë për të plotësuar KQZ-në. Kjo është një çështje që është e lidhur ngushtësisht me besimin që kanë zgjedhësit në proces", tha Sequi.

Ambasadori theksoi se liderët politikë dhe partitë politike duhet të sigurojnë që zgjedhësit shqiptarë të kenë besim tek procesi, ta pranojnë rezultatin dhe ta respektojnë atë.

Sequi shtoi se pret që në procesin e votimit të ketë pjesëmarrje masive, sidomos të atyre që votojnë për herë të parë.

"Njerëzit duhet të votojnë sepse ky është një detyrim, por edhe një e drejtë e tyre", tha Sequi, i cili siguroi se BE do të vëzhgojë procesin e votimit dhe atë të numërimit, që për komunitetin ndërkombëtar është tepër i rëndësishëm.
 

 Top Channel