Ndërprerjet kolektive, CEZ rrezikon gjobë 1.2 % të xhiros vjetore

Enti Rregullator i Energjisë nis procedurat për të gjobitur kompaninë e shpërnadarjes së energjsë CEZ Albania. Bordi drejtues i ERE-s ka zhvilluar një mbledhje, në të cilin janë marrë në shqyrtim ankesat e qytetarëve për ndërprerjet kolektive të energjisë. Pritet verifikimi i këtyre ankesave dhe në rast se ato faktohen, CEZ do të gjobitet me 1.2 % të xhiros vjetore të vitit 2011. Gjoba që do të duhet të paguajë CEZ përllogarritet rreth 4.5 milionë dollarë. 

Burimet zyrtare pranë Entit Rregullator të Energjisë bëjnë të ditur se janë ngritur grupe monitoruese për të verifikuar në zona të ndryshme të vendit ndërprerjet kolektive të energjisë. 
Shumë konsumatorë kanë ngritur pretendimin se iu është ndërprerë energjia elektrike në një kohë kur paguajnë faturat çdo muaj. Në disa komuna apo fshtara ka pasur ndërprerje të energjisë dhe kjo ka sjellë edhe protesta në këto zona. 

Nga ana e saj kompania "CEZ Shpërndarje" ka hedhur poshtë pretendimet e ngritura për ndërprerje kolektive të energjisë elektrike. Përmes një njoftimi për mediat, CEZ sqaron se ndërprerjet e furnizimit me energji kryhen vetëm për klientët debitorë dhe kabinat 100 % debitore, duke theksuar se në asnjë rast, kompania nuk ka kryer "dënime kolektive". Albanian Screen