Nëntori i Dytë, shfaqet filmi i restauruar në SHBA

30 vite pasi u prodhua nga regjisori Viktor Gjika, filmi "Nëntori i Dytë" preku sërish ekranin e madh të kinemasë. Këtë herë i restauruar në Shtetet e Bashkuara, cilësia befasoi të pranishmit që kishin mbushur sallën. 

Filmi ikonë i shqiptarëve u projektua për të nderuar ngritjen e siparit të Festivalit të Filmit Shqiptar, por ishte edhe një homazh për regjisorin Gjika. 
Edicioni i 13-të i tij rikthehet pas 6 vitesh shkëputjeje me organizimin e Qendrës Kombëtare të Kinematografisë. 
 
Çelja e festivalit mblodhi sëbashku kineastë, regjisorë, skenaristë, aktorë e njerëz të njohur nga bota e kinematografisë. Të gjithë ecën njëri-pas tjetrit në tapetin e kuq.

Rreth 106 filma të prodhuar 6 vitet e fundit, artistik, me metrazh të shkurtër, të animuar dhe dokumentar do të projektohen për 7 ditë në sallën e Kinema Millenium, Teatrit Kombëtar dhe atij të Komedisë, duke e kthyer rrugën Murat Toptani në zonë të filmit. 

Shfaqjet e filmave do të shoqërohen edhe me diskutime dhe konferenca për shtyp, por nuk do të mungojnë edhe të ftuarit e veçantë. Albanian Screen