Meta: Figura e Zogut të mos mbivlerësohet

Kreu i LSI-së Ilir Meta, i ftuar në emisionin “Debat” të gazetarit Alfred Peza në “Vizion Plus”, tha se figura e Mbretit Zog është mbivlerësuar. Ai kërkoi vlerësimin e të gjitha figurave të këtij 100-vjetori, ndërsa veçoi si dy figurat qendrore të historisë 100- vjeçare të shtetit shqiptar Enver Hoxhën dhe Ahmet Zogun.

“Ahmet Zogu dhe Enver Hoxha janë dy figurat kryesore të historisë së Shqipërisë në këto 100 vite, për arsye se kanë përcaktuar epokat e qeverisjes edhe ndër vite. Sigurisht që, kur flitet për këto 100 vite, flitet për personalitete si Ismail Qemali për shkak të aktit që kreu dhe që simbolizonte një vullnet të të gjithë patriotëve shqiptarë të asaj kohe, por dhe të gjithë figurave të tjera sipas peshës që ata kanë pasur gjatë këtyre viteve. Kështu që ka qenë e pashmangshme që diskutohej edhe për Ahmet Zogun. Unë mendoj se kjo është një figurë që duhet të rivlerësohej pas vitit ’90, por nuk ka arsye që të mbivlerësohej”- ka thene Meta.

Sipas tij, aktualisht kemi qenë në periudhën e mbivlerësimit. “Mendoj se shumë gjëra që kemi mësuar gjatë periudhës së komunizmit, janë të pavërteta lidhur me këtë figurë që ka disa merita të veçanta”- ka thene ai.

I pyetur per ikjen e Zogut me 7 prill ’39, Meta eshte pergjigjur se e mendon nje akt dobesie. ” Sepse pavarësisht se nuk e pranoi pushtimin, ai duhet të kishte qëndruar dhe të tregonte se përpjekjet e tij për të krijuar shtetin shqiptar kishin dhënë rezultat duke rezistuar”- tha ai.

Panorama