Merkel-Cameron, përplasje për buxhetin e Evropës

Bisedimet plot kundërshti për buxhetin e ri të Bashkimit Evropian, kanë qenë në vëmendjen e dy prej liderëve kryesorë të Brukselit, kryeministrit britanik, David Cameron dhe kancelares gjermane, Angela Merkel kur ata u takuan në Londër. Edhe pse në përfundim të takimit njëorësh, Downing Street 10 njoftoi se palët ndodhen në të njëjtën spektër mendimesh, duket se asgjë nuk është zgjidhur në kontradiktat mes Londrës e Berlinit. Kryeministri Cameron i mbahet pikëpamjes së buxheti i BE-së duhet të ngrijë ose të shkurtohet, ndërsa kancelarja Merkel e quan të domosdoshme rritjen e tij. 

"Do të ishte gabim që buxheti të rritej, në një kohë kur e kemi të vështirë të marrim vendime të vështira ekonomike, si këtu në Britani ashtu edhe në të gjitha vendet e tjera në lidhje me sjelljen e buxheteve kombëtare drejt balancës. Gjithsesi, do të përpiqemi të gjejmë një zgjidhje të mirë për taksapaguesit britanikë, të cilën të mund ta paraqes në Parlament e përballë gjithë popullit",-u shpreh Cameron. 

"Po kërkojmë një zgjidhje e cila të jetë e pranueshme për opinionin publik, edhe në Gjermani. Tashmë është shumë e rëndësishme ajo që do të bëjmë me buxhetin e BE-së. Kemi parë se jo të gjitha fondet janë shfrytëzuar me efikasitet, në këto vitet e fundit, por Evropa ka nevojë për inovacion, të investojë për të ardhmen e saj, kështu që ne duhet t'i kemi parasysh këto aspekte. Debatet do të vazhdojnë, në frymën e partneritetit dhe miqësisë",-tha Merkel. 

Kancelarja gjermane nuk e la veten të tërhiqej nga tema e përfolur kohët e fundit, nëse Britania e Madhe duhet të vendosë të tërhiqet ose jo nga BE, sikundër kanë deklaruar tashmë edhe disa zyrtarë të Brukselit. Mirëpo, duke folur më herët në Parlamentin Evropian, ajo dha një mesazh të drejtpërdrejtë për popullin e Britanisë, duke thënë se njerëzit e këtij ishulli të mrekullueshëm nuk do të jenë më të lumtur, nëse mbeten të vetëm në këtë botë. Reagimi i saj erdhi pasi disa eurodeputetë i kërkuan Merkel t'ia bëjë të qartë Cameron, se ka ardhur koha për një divorc të thjeshtë e miqësor të Brukselit me Britaninë, e cila është krejtësisht kundër rrymës për një integrim më të madh të Bashkimit Evropian, që promovohet nga gjermanët.

Albanian Screen