Kryeministri Rama viziton QSUT-në

Kryeministri Edi Rama, gjatë një takimi me mjekët dhe personelin e QSUT-së, theksoi se “ky spital është shëmbëlltyra e rrënimit të vendit”.
“Mbahet në këmbë vetëm falë një grushti mjekësh dhe personeli që nuk e kanë braktisur misionin human; këtë spital e mbajnë në këmbë themelet që i kanë vënë etërit e mjekësisë shqiptare të cilët kishin mundësi të ndërtonin karrierën jashtë vendit tonë, por vendosën të ktheheshin këtu; e mbajnë në këmbë edhe të rinjtë me ëndrra dhe pasion, por ky nuk është spital për kohën e sotme megjithë paratë e harxhuara në këto 20 vite”, u shpreh Rama.
Kryeministri theksoi se QSUT-ja ka plot 22 milionë dollarë detyrime të prapambetura: “Detyrimet e prapambetura ndaj furnizuesve të barnave janë 30 milionë dollarë, 22 i ka vetëm ky spital. Borxhi ynë është 600 milionë dollarë në total dhe kriza aktuale e ka vendosur buxhetin e shtetit dhe ekonominë në vështirësi shumë të madhe. Megjithatë, unë hyj tek ata që mendoj se ky spital nuk ka nevojë për më shumë lekë, por për një tjetër sistem. Nuk mungojnë kapacitetet, por sistemi.”
“Ne nuk do të justifikohemi me borxhin e QSUT-së, por do i lajmë këto borxhe pasi është përgjegjësia jonë. Do i lajmë borxhet dhe më pas, brenda një sistemi të ri organizimi, do i bëjmë spitalet vende solidariteti dhe jo vetëm diagnostikimi”, shtoi Edi Rama, i cili shpjegoi edhe vendimin e emërimit si drejtoreshë të QSUT-së, Ogerta Manastirliut.
“I kemi dhënë besim një drejtoreshe të re që nuk vjen nga sistemi. Njeriu që drejton QSUT-në nuk ka pse të jetë mjek dhe nuk duhet të jetë mjek, por një individ që do të mbrojë interesat e sektorit duke mbrojtur interesat e publikut dhe duke garantuar dialog, përgjegjësi dhe partneritet.”
Në fund, Rama premtoi se qeveria “nuk do të blejë më barna me çmime të larta dhe nuk do të lejojë më që barnat të shiten 3 herë më shtrenjtë se vendi i origjinës. Do të heqim TVSH-në mbi ilaçet për të ulur çmimin e tyre."
Top Channel
Add new comment